ஏடிஎம் அட்டை வந்த சில நிமிடங்களில்  வங்கிக் கணக்கிலிருந்து ரூ. 50 ஆயிரம் திருட்டு: எஸ்.பி. அலுவலகத்தில் ஆசிரியை புகார்

புதிய ஏடிஎம் அட்டை வந்த சில நிமிடங்களில் வங்கிக் கணக்கிலிருந்து ரூ. 50 ஆயிரம் திருடப்பட்டுள்ளதாக தனியார் பள்ளி ஆசிரியை வேலூர் எஸ்.பி. அலுவலகத்தில் புகார் அளித்துள்ளார். 
காட்பாடி எம்.ஜி.ஆர். நகரைச் சேர்ந்தவர் அஸ்பியா பாத்திமா (24). தனியார் பள்ளியில் ஆசிரியையாக பணியாற்றுகிறார். கடந்த மாதம் ஏடிஎம் அட்டைக்காக அவர் கணக்கு வைத்துள்ள வங்கியில் விண்ணப்பித்துள்ளார். அதன்பேரில், சில வாரங்களில் புதிய ஏடிஎம் அட்டை கூரியர் மூலம் அஸ்பியா பாத்திமா வீட்டிற்கு வந்துள்ளது.
அந்த ஏடிஎம் அட்டை வந்த அரைமணி நேரத்தில் அஸ்பியா பாத்திமாவின் செல்லிடப்பேசிக்கு வந்த அழைப்பில் பேசிய நபர், புதிய ஏடிஎம் அட்டை பதிவு செய்ய அதில் உள்ள எண்கள், ரகசிய எண் ஆகியவற்றை கேட்டராம். அந்த எண்களை அஸ்பியா பாத்திமா கூறிய சில நிமிடங்களிலேயே அவரது வங்கிக் கணக்கிலிருந்து 2 தவணையாக
ரூ. 50 ஆயிரம் எடுக்கப்பட்டதாக குறுஞ்செய்தி வந்துள்ளது. 
இதுதொடர்பாக, அஸ்பியா பாத்திமா சம்பந்தப்பட்ட வங்கியில் தொடர்பு கொண்டு கேட்டபோது, அவரது வங்கிக் கணக்கிலிருந்து கடலூர், விசாகப்பட்டினம் ஆகிய இரு இடங்களில் இருந்து பொருள்கள் வாங்கியதற்கு பணம் கழிக்கப்பட்ட விவரம் தெரியவந்துள்ளது. 
இதனால் பாதிக்கப்பட்ட அஸ்பியா பாத்திமா, வேலூர் எஸ்.பி. அலுவலகத்தில் புதன்கிழமை புகார் அளித்தார். அதன்பேரில், போலீஸார் விசாரணை நடத்தி 
வருகின்றனர்.