கிறிஸ்தவ ஆலயம் அருகே விநாயகர் சிலை: இந்து முன்னணிக்கு போலீஸ் தடை

அரக்கோணம் நகரில் கிறிஸ்தவ ஆலயம் அருகே விநாயகர் சிலை வைக்க இந்து முன்னணியினர் பந்தல் அமைக்க முயற்சித்த நிலையில், அதற்கு போலீஸார் புதன்கிழமை தடை விதித்தனர். 
அரக்கோணம் சுவால்பேட்டை, தர்மராஜா கோயில் மைதானம் மற்றும் ராமர் கோயில் அருகே கலைவானர் தெருவில் விநாயகர் சதுர்த்தியை முன்னிட்டு, விநாயகர் சிலை வைக்க நகர இந்து முன்னணியினர் பந்தல் அமைக்கும் பணியில் புதன்கிழமை ஈடுபட்டனர். அப்பகுதிக்கு அருகிலேயே கிறிஸ்தவ ஆலயம் உள்ளது. இதனால், அங்கு விநாயகர் சிலை வைக்க எதிர்ப்பு தெரிவித்த திருச்சபை நிர்வாகிகள், அரக்கோணம் டி.எஸ்.பி.யிடம் புகார் அளித்ததாகத் தெரிகிறது. 
இதையடுத்து இரு தரப்பிலும் விசாரணை நடத்திய டி.எஸ்.பி. குத்தாலிங்கம், புதிதாக இந்த ஆண்டு அங்கு விநாயகர் சிலை வைக்க தடை விதித்து உத்தரவிட்டார். மேலும், அப்பகுதியில் பலத்த போலீஸ் பாதுகாப்பும் போடப்பட்டது. ஏற்கெனவே அப்பகுதிக்கு அருகில் தர்மராஜா கோயில் மைதானத்தில் ஒரு சிலையும்,  அதன் அருகில் முருகப்பா தெருவில் இந்து முன்னணி சார்பில் ஒரு விநாயகர் சிலையும் வைக்க அனுமதி அளிக்கப்பட்டுள்ளது.
இதுகுறித்து தினமணி செய்தியாளரிடம் டி.எஸ்.பி. குத்தாலிங்கம் கூறுகையில், புதிதாக சிலை வைக்க எந்த இடத்திலும் அனுமதி அளிக்கப்படவில்லை. தற்போது கலைவாணர் தெருவில் இந்த ஆண்டு புதிதாக விநாயகர் சிலை வைக்க மேற்கொண்ட முயற்சிக்கு தடை விதிக்கப்பட்டுள்ளது. 
கடந்த ஆண்டு எங்கெங்கு விநாயகர் சிலைகள் வைக்கப்பட்டதோ அந்த இடங்களில் மட்டுமே இந்த ஆண்டும் விநாயகர் சிலை வைக்க அனுமதி அளிக்கப்பட்டுள்ளது என்றார் அவர்.