பழங்குடியினருக்கு ரூ.9 லட்சம் மதிப்பிலான நலத்திட்ட உதவிகள்

ஆசனூரில் உள்ள பழங்குடியினருக்கு விவசாய மேம்பாட்டுப் பணிகளுக்காக ரூ.9 லட்சம் மதிப்பிலான நலத்திட்ட உதவிகள் புதன்கிழமை வழங்கப்பட்டன.

சத்தியமங்கலம் புலிகள் காப்பக வனப் பகுதியில் உள்ள ஆசனூா் மற்றும் அதன் சுற்றுவட்டார மலைப் பகுதிகளில் வசித்து வரும் பழங்குடியின மக்களின் கல்வி, சுகாதாரம் மற்றும் வாழ்வாதார மேம்பாட்டிற்காக ரீடு நிறுவனம் தொடா்ந்து பல்வேறு சமூக நலத்திட்டப் பணிகளை மேற்கொண்டு வருகிறது. அதன் தொடா்ச்சியாக, மலைவாழ் கிராமங்களைச் சோ்ந்த பழங்குடியின மக்களின் வாழ்வாதாரத்தை மேம்படுத்தும் நோக்கில், கால்நடைகள் வாங்குவதற்கான நிதியுதவி மற்றும் விவசாயப் பணிகளுக்குத் தேவையான ஆயில் என்ஜின்கள் வழங்கும் நிகழ்ச்சி ஆசனூரில் புதன்கிழமை நடைபெற்றது.

ரீடு நிறுவனத்தின் திட்ட அலுவலா் சிவராஜ் வரவேற்றாா். ரீடு நிறுவனத்தின் இயக்குநா் கருப்புசாமி தலைமை வகித்து, பயனாளிகளுக்கு நலத்திட்ட உதவிகளை வழங்கினாா்.

இதில் 11 நபருக்கு கறவை மாடுகள், 13 நபருக்கு ஆடுகள் வாங்க நிதி உதவி, நீா் மேலாண்மை பணிகளுக்காக 8 பேருக்கு ஆயில் என்ஜின் என மொத்தம் ரூ. 9 லட்சத்து 13,500 மதிப்பிலான நலத்திட்ட உதவிகள் வழங்கப்பட்டன.