திருப்பூா் மாநகரில் இன்று விநாயகா் விசா்ஜன ஊா்வலம்: பாதுகாப்பு பணியில் 1,400 போலீஸாா்

திருப்பூரில் விநாயகா் விசா்ஜன ஊா்வலம் வியாழக்கிழமை (செப்.17) நடைபெறுவதையொட்டி பாதுகாப்பு பணியில் 1,400 போலீஸாா் ஈடுபடுத்தப்பட்டுள்ளனா்.

விநாயகா் சதுா்த்தி விழாவையொட்டி திருப்பூா் மாநகா், மாவட்டம் முழுவதும் இந்து முன்னணி, விஸ்வ ஹிந்து பரிஷத் பாரத்சேனா உள்ளிட்ட பல்வேறு இந்து அமைப்புகள் மற்றும் பொதுமக்கள் சாா்பில் 2,500 விநாயகா் சிலைகள் பிரதிஷ்டை செய்யப்பட்ட ன. இதில் திருப்பூா் மாநகர மற்றும் மாவட்ட இந்து முன்னணி சாா்பில் மட்டும் 1,000 சிலைகள் பிரதிஷ்டை செய்யப்பட்டுள்ளன. பிரதிஷ்டை செய்யப்பட்ட சிலைகளுக்கு தினமும் 3 வேளை பூஜைகள் செய்யப்பட்டு வந்தன.

இந்நிலையில், சிலைகளை நீா்நிலைகளில் கரைக்கும் விசா்ஜன ஊா்வலம் புதன்கிழமை முதல் தொடங்கியது. இந்து முன்னணி சாா்பில் வியாழக்கிழமை விசா்ஜன ஊா்வலம் நடைபெறுகிறது.

திருப்பூா் புதிய பேருந்து நிலையம், தாராபுரம் சாலை மற்றும் செல்லம் நகா் ஆகிய 3 முக்கிய இடங்களில் இருந்து ஒரே நேரத்தில் ஊா்வலம் புறப்படுகிறது. அங்கிருந்து நகரின் முக்கிய சாலைகள் வழியாகச் சென்று ஆலாங்காட்டில் நிறைவடைகிறது. அங்கு நடைபெறும் பொதுக்கூட்டத்தில் இந்து முன்னணி மாநிலத் தலைவா் காடேஸ்வரா சி.சுப்பிரமணியம், பொதுச் செயலாளா் கிஷோா்குமாா், மாநிலச் செயலாளா் செந்தில்குமாா் உள்பட பல பேசுகின்றனா். காமாட்சிபுரி ஆதீனம் ஸ்ரீ பஞ்சலிங்கேஸ்வா் சுவாமிகள் ஆசியுரை வழங்குகிறாா். இந்து முன்னணி கேரளா மாநிலத் தலைவா் கே.பி. சசிகலா, நடிகா் ரஞ்சித் ஆகியோா் சிறப்புரையாற்றுகின்றனா்.

ஊா்வலத்தின்போது அசம்பாவிதங்கள் ஏதும் ஏற்படாமல் இருக்க திருப்பூா் மாநகர காவல் ஆணையா் எஸ்.ராஜேஸ்வரி நேரடி மேற்பாா்வையில், சேலம் மாவட்ட போலீஸாா், 200 பட்டாலியன் போலீசாா் மற்றும் ஊா்க்காவல் படையினா் என மொத்தம் 1,400 போலீஸாா் பாதுகாப்பு பணியில் ஈடுபடுத்தப்பட்டுள்ளனா். முக்கிய பாதைகள் மற்றும் சந்திப்புகளில் கண்காணிப்பு கேமராக்கள் பொருத்தப்பட்டுள்ளன.

போக்குவரத்து மாற்றம்; கனரக வாகனங்களுக்கு தடை

திருப்பூா் மாநகரில் விநாயகா் விசா்ஜன ஊா்வலம் வியாழக்கிழமை (செப்.17)நடைபெறுவதையொட்டி, சீரான வாகனப் போக்குவரத்தை உறுதி செய்யும் வகையில் காலை 8 மணி முதல் இரவு 10 மணி வரை போக்குவரத்து மாற்றம் செய்யப்பட்டுள்ளது. இந்த குறிப்பிட்ட நேரத்தில் கனரக வாகனங்கள் திருப்பூா் மாநகருக்குள் நுழையவோ அல்லது மாநகரத்தில் இருந்து வெளியே செல்லவோ அனுமதி இல்லை.

ஊா்வலப் பாதையை பொறுத்தும், ஊா்வல நேரத்திலும் வாகனங்கள் மாற்று வழியில் செல்ல ஏற்பாடு செய்யப்பட்டுள்ளது. அதன்படி, அவிநாசி தேசிய நெடுஞ்சாலையில் இருந்து திருப்பூா் நோக்கி வரும் இலகுரக வாகனங்கள் அனைத்தும் திருமுருகன்பூண்டியில் இருந்து பூலுவபட்டி, நெருப்பெரிச்சல், கூலிப்பாளையம் நான்கு சாலை வழியாக செல்லலாம். அவிநாசி சாலையில் இருந்து புதிய பேருந்து நிலையம் செல்லும் வாகனங்கள் கரூா் வைஸ்யா வங்கி அருகில் நிற்க வேண்டும்.

நல்லூா், முத்தணம்பாளையம் காங்கயம் சாலை சந்திப்பு வழியாக திருப்பூா் மாநகருக்குள் வரும் இலகுரக வாகனங்களும், தாராபுரம் சாலையில் இருந்து திருப்பூா் நோக்கி வரும் அனைத்து வாகனங்களும் கோவில்வழி, பெருந்தொழுவு, முத்தணம்பாளையம் வழியாக காங்கயம் சாலை செல்ல வேண்டும்.

காங்கயம் சாலையில் இருந்து தாராபுரம் நோக்கி செல்லும் வாகனங்கள் உஷா திரையரங்க சிக்னல் சந்திப்பில் திரும்பி பேருந்து நிலையம், சந்தைப்பேட்டை, வீரபாண்டி பிரிவு சென்று பழவஞ்சிபாளையம் வழியாக தாராபுரம் சாலையை அடையலாம். அங்கிருந்து நெருப்பெரிச்சல் கூலிப்பாளையம் நான்கு சாலை வழியாக காங்கயம், தாராபுரம் மற்றும் ஊத்துக்குளி செல்லலாம்.

இதற்கு பொதுமக்களும், வாகன ஓட்டிகளும் முழு ஒத்துழைப்பு அளிக்க வேண்டும் என்று குறிப்பிடப்பட்டுள்ளது.