24 ஆண்டுகள் நடைபெற்ற வழக்கு: 8 பேருக்கு 10 ஆண்டு சிறை

நாமக்கல் மாவட்டம், திருச்செங்கோடு ஒருங்கிணைந்த நீதிமன்றத்தில் 24 ஆண்டுகளாக நடைபெற்று வந்த வழக்கில் 8 பேருக்கு தலா 10 ஆண்டுகள் சிறைத் தண்டனையும், ரூ.10 ஆயிரம் அபராதமும் விதித்து கூடுதல் மாவட்ட நீதிபதி மாலதி புதன்கிழமை தீா்ப்பளித்தாா்.

நாமக்கல் மாவட்டம், திருச்செங்கோடு கூட்டப்பள்ளி பகுதியைச் சோ்ந்த பாண்டுரங்கன், வீட்டுக் கதவு விற்பனை தொழில் செய்து வந்தாா். அவா், நாமக்கல்லைச் சோ்ந்த மருத்துவா் ராஜ்குமாா் என்பவரிடம் கடன் பெற்றிருந்தாா். அதில் ஒரு பகுதியை திருப்பிச் செலுத்தியிருந்த நிலையில், தொழிலில் ஏற்பட்ட நஷ்டம் காரணமாக மீதமுள்ள தொகையை செலுத்த முடியவில்லை.

இதையடுத்து, கடனுக்கான உத்தரவாதமாக தனது கூட்டப்பள்ளியில் உள்ள வீட்டை மருத்துவா் ராஜ்குமாரிடம் பத்திரம் செய்து கொடுத்தாா். பின்னா், 1999-ஆம் ஆண்டு அந்த வீட்டை தனது பெயருக்கு கிரயம் செய்து கொண்டதாக கூறப்படுகிறது.

இதை எதிா்த்து, 2001-ஆம் ஆண்டு பாண்டுரங்கன் நீதிமன்றத்தில் வழக்கு தொடா்ந்தாா். அந்த வழக்கில், ஒரு மாதத்திற்குள் வீட்டை பாண்டுரங்கனிடம் ஒப்படைக்க வேண்டும் என்று நீதிமன்றம் உத்தரவிட்டது.

ஆனால், 2002-ஆம் ஆண்டு மருத்துவா் ராஜ்குமாா், 30-க்கும் மேற்பட்ட ஆட்களுடன் பாண்டுரங்கன் வீட்டுக்குச் சென்று கதவை உடைத்து, வீட்டிலிருந்த அவரது மகன்கள், மகள், மருமகன் ஆகியோரை மிரட்டி, வீட்டுப் பொருட்களை சேதப்படுத்தி, மீதமுள்ள பொருட்களை லாரிகளில் ஏற்றிச் சென்றதாக கூறப்படுகிறது.

இதுகுறித்து திருச்செங்கோடு நகர காவல் நிலையத்தில் புகாா் அளிக்கப்பட்டது. அதன் பேரில் 31 போ் மீது வழக்குப்பதிவு செய்யப்பட்டு விசாரணை நடைபெற்றது.

24 ஆண்டுகளாக நடைபெற்ற இந்த வழக்கில் சிலா் விடுவிக்கப்பட்டனா். மேலும், மதன்குமாா், ஜெகன், மின்னல்குமாா், பாபு, ராஜி, நடேசன் உள்ளிட்ட சிலா் உயிரிழந்தனா்.

இந்த நிலையில், முக்கிய குற்றவாளிகளான டாக்டா் ராஜ்குமாா் (78), சிவக்குமாா் (54), செந்தில் (52), மோகன் என்ற மோகனசுந்தரம் (65), கமல் என்ற சீனி (47), சக்தி என்ற சத்தியமூா்த்தி (56), வாழைக்காய் கண்ணன் (48), ரமேஷ் (45) ஆகிய 8 பேருக்கு தலா 10 ஆண்டுகள் சிறைத் தண்டனையும், ரூ.10 ஆயிரம் அபராதமும் விதித்து கூடுதல் மாவட்ட நீதிபதி மாலதி தீா்ப்பளித்தாா்.