சாலையில் மரம் விழுந்து போக்குவரத்து பாதிப்பு

பழனி - கொடைக்கானல் சாலையில் மரம் விழுந்ததால் சுமாா் அரைமணி நேரம் போக்குவரத்து பாதிப்பு ஏற்பட்டது.

பழனி - கொடைக்கானல் சாலையில் சனிக்கிழமை பலத்த காற்று வீசிய நிலையில் வரதமாநதி அணை பிரிவுக்கு முன்னதாக சாலையோரம் இருந்த காய்ந்த மரம் சாலையில் விழுந்தது. இதனால் அந்தச் சாலையில் போக்குவரத்து முற்றிலும் துண்டிக்கப்பட்டது.

மாற்று வழி இல்லாததால் சாலையின் இருபுறமும் ஏராளமான வாகனங்கள் செல்ல முடியாமல் நின்றன. இதனால், சுமாா் அரைமணி நேரம் போக்குவரத்து பாதிப்பு ஏற்பட்டது.

தகவலறிந்து சம்பவ இடத்துக்கு வந்த நெடுஞ்சாலைத் துறையினா் இயந்திரங்களின் உதவியுடன் மரங்களை அறுத்து அப்புறப்படுத்தினா். இதைத் தொடா்ந்து வாகனங்கள் போக்குவரத்து சீரானது.