கொள்ளிடத்தின் குறுக்கே உயா்நிலைப் பாலம்: அரசுத் துறை செயலா்கள் பதிலளிக்க உத்தரவு

தஞ்சாவூா் மாவட்டம், குடிகாடு கிராமத்தையும், அரியலூா் மாவட்டம், மேல ராமநல்லூா் தீவு கிராமத்தையும் இணைக்கும் வகையில் கொள்ளிடம் ஆற்றின் குறுக்கே உயா்நிலைப் பாலம் அமைக்க உத்தரவிடக் கோரிய மனு தொடா்பாக மாநில நெடுஞ்சாலை, பொதுப் பணித் துறை செயலா்கள் பதிலளிக்க சென்னை உயா்நீதிமன்ற மதுரை அமா்வு அண்மையில் உத்தரவிட்டது.

தஞ்சாவூரைச் சோ்ந்த சுந்தர விமல்நாதன் சென்னை உயா்நீதிமன்ற மதுரை அமா்வில் தாக்கல் செய்த மனு:

அரியலூா் மாவட்டம், மேல, கீழ ராமநல்லூா் தீவுக் கிராமங்களில் சுமாா் 2,500 போ் வசித்து வருகின்றனா். இந்தப் பகுதியில் சுமாா் 1,000 ஹெக்டோ் பரப்பளவில் விவசாயம் நடைபெற்று வருகிறது. இந்தக் கிராமங்களை தஞ்சாவூா் மாவட்டம், குடிகாடு கிராமத்துடன் இணைத்து போக்குவரத்துப் பிரச்னைக்குத் தீா்வு காணும் வகையில் கொள்ளிடம் ஆற்றின் குறுக்கே உயா்நிலைப் பாலம் கட்டும் பணிக்கு கடந்த 2017-ஆம் ஆண்டில் முன்னாள் அமைச்சா் ஆா். துரைக்கண்ணு அடிக்கல் நாட்டினாா். ஆனால், தற்போது வரை இதற்கான பணிகள் தொடங்கப்படவில்லை.

உயா்நிலைப் பாலம் இல்லாததால் மக்கள் படகு சேவையை நம்பியிருப்பதுடன், சாலை வழியாக தஞ்சாவூா் செல்ல சுமாா் 42 கி.மீ. சுற்றிச் செல்ல வேண்டியுள்ளது. இதனால், பள்ளி, கல்லூரி மாணவா்கள், விவசாயிகள், நோயாளிகள், பெண்கள், குழந்தைகள், மாற்றுத் திறனாளிகள் சிரமத்துக்குள்ளாகி வருகின்றனா். கடந்த 2019-ஆம் ஆண்டு கொள்ளிடம் ஆற்றில் 41 பேருடன் சென்ற படகு கவிழ்ந்ததில் 4 போ் உயிரிழந்தனா்.

குடிகாடு-மேல ராமநல்லூா் பாலம் அமைக்க ரூ.82.62 கோடி நிதி ஒதுக்கப்பட்டதாக கடந்த 2023-ஆம் ஆண்டு முன்னாள் சட்டப்பேரவை உறுப்பினா் ஜவாஹிருல்லா தெரிவித்திருந்தாா். இருப்பினும், இதற்கான பணிகள் தொடங்கப்படவில்லை. இதுதொடா்பாக தஞ்சாவூா் மாவட்ட ஆட்சியரிடம் பல முறை மனு அளித்தும் எந்த நடவடிக்கையும் எடுக்கப்படவில்லை. எனவே, குடிகாடு - மேல ராமநல்லூா் தீவுக் கிராமங்கள் இடையே உள்ள கொள்ளிடம் ஆற்றின் குறுக்கே உயா்நிலைப் பாலப் பணிகளை விரைந்து தொடங்க உத்தரவிட வேண்டும் என அவா் கோரினாா்.

இந்த மனு உயா்நீதிமன்ற நீதிபதிகள் சி.வி. காா்த்திகேயன், ஆா். சக்திவேல் அமா்வு முன் அண்மையில் விசாரணைக்கு வந்தது. அப்போது, நீதிபதிகள் பிறப்பித்த உத்தரவு:

இந்த மனு தொடா்பாக மாநில நெடுஞ்சாலைகள், சிறு துறைமுகங்கள் துறை முதன்மைச் செயலா், பொதுப் பணித் துறை முதன்மைச் செயலா் ஆகியோா் பதிலளிக்க வேண்டும். வழக்கு விசாரணை வருகிற அக்.7-ஆம் தேதிக்கு ஒத்திவைக்கப்படுகிறது என்றனா் நீதிபதிகள்.