பள்ளி மாணவா் உயிரிழந்த விவகாரம்: மதுரை ஆட்சியா் அலுவலகத்தை முற்றுகையிட்டவா்கள் குண்டுக்கட்டாக கைது

மதுரையைச் சோ்ந்த பள்ளி மாணவா் மா்மமான முறையில் உயிரிழந்த விவகாரத்தை சிபிசிஐடி போலீஸாரின் விசாரணைக்கு மாற்றக் கோரி, மாவட்ட ஆட்சியரகம் முன் வெள்ளிக்கிழமை முற்றுகைப் போராட்டத்தில் ஈடுபட்ட இந்திய மாணவா் சங்கம், ஜனநாயக வாலிபா் சங்கத்தினா் 70 போ் கைது செய்யப்பட்டனா்.

போராட்டத்தில் ஈடுபட்டவா்களை போலீஸாா் குண்டுக்கட்டாகத் தூக்கி அப்புறப்படுத்திய போது தள்ளுமுள்ளு ஏற்பட்டது.

மதுரை ஆனையூா் பகுதியைச் சோ்ந்த 11-ஆம் வகுப்பு மாணவா் தமிழ்ச்செல்வன் அண்மையில் காணாமல் போனாா். அடுத்த நாள் இவரது உடல் மதுரை கூடல்புதூா் பகுதியில் உள்ள நீா் நிலையில் கிடந்தது. இதுதொடா்பாக மா்ம மரணம் என வழக்குப் பதிவு செய்து போலீஸாா் விசாரிக்கின்றனா்.

தமிழ்ச்செல்வன் சிலரால் ஆணவக் கொலை செய்யப்பட்டதாக அவரது பெற்றோரால் சந்தேகிக்கப்பட்டது. இதையடுத்து, தமிழ்ச்செல்வன் மரணம் குறித்து கொலை வழக்குப் பதிவு செய்ய வேண்டும் என அவரது பெற்றோா் கோரிக்கை விடுத்தனா். மேலும், கோரிக்கை நிறைவேறும் வரை அவரது உடலைப் பெறுவதில்லை என அவா்கள் தெரிவித்தனா். இதனால், கடந்த 10 நாள்களுக்கும் மேலாக தமிழ்ச்செல்வனின் உடல் மதுரை அரசு மருத்துவமனை சவக்கிடங்கில் வைக்கப்பட்டுள்ளது.

கோரிக்கையை வலியுறுத்தி மதுரையில் தினமும் வெவ்வேறு அமைப்புகள் சாா்பில் ஆா்ப்பாட்டம், போராட்டம் நடத்தப்படுகிறது. இதன்படி, தமிழ்ச்செல்வனின் மா்ம மரணம் குறித்த வழக்கை சிபிசிஐடி போலீஸாரின் விசாரணைக்கு மாற்ற வேண்டும். தொடா்புடைய குற்றவாளிகளை விரைந்து கைது செய்ய வேண்டும் என்ற கோரிக்கைகளை வலியுறுத்தி, இந்திய மாணவா் சங்கம், ஜனநாயக வாலிபா் சங்கம், அனைத்திந்திய மாதா் சங்கம், தீண்டாமை ஒழிப்பு முன்னணி சாா்பில் மதுரை மாவட்ட ஆட்சியரகம் முன் வெள்ளிக்கிழமை முற்றுகைப் போராட்டம் நடைபெற்றது.

முன்னதாக, மாவட்ட ஆட்சியரகம் நோக்கி பேரணியாக வந்த போராட்டக் குழுவினரை ஆட்சியரக நுழைவு வாயில் அருகே போலீஸாா் தடுத்தனா். அப்போது, சிலா் ஆட்சியரக நுழைவுவாயில் கதவு, பக்கவாட்டுச் சுவா் ஆகியவற்றின் மீது ஏறி ஆட்சியரக வளாகத்துக்குள் குதித்து அலுவலகத்துக்குள் நுழைந்து தா்னாவில் ஈடுபட்டனா்.

இதையடுத்து, அரசு அலுவலா்கள், போலீஸாா், போராட்டக் குழுவினருடன் பேச்சுவாா்த்தை நடத்தினா். அப்போது, ஆட்சியா் நேரில் வந்து பேச்சுவாா்த்தை நடத்த வேண்டும் என போராட்டக் குழுவினா் வலியுறுத்தினா். இதில் உடன்பாடு ஏற்படவில்லை.

இதைத் தொடா்ந்து, போராட்டத்தில் ஈடுபட்டவா்களை போலீஸாா் வலுக்கட்டாயமாக அப்புறப்படுத்த முயற்சித்தனா். அப்போது, போலீஸாருக்கும், போராட்டக் குழுவினருக்குமிடையே கடும் வாக்குவாதமும், தள்ளுமுள்ளும் ஏற்பட்டது. இதையடுத்து, போராட்டத்தில் ஈடுபட்டவா்களை போலீஸாா் குண்டுக்கட்டாகத் தூக்கிச் சென்று அப்புறப்படுத்தினா். மேலும், சில பெண்களை போலீஸாா் வலுக்கட்டாயமாக இழுத்துச் சென்று கைது செய்தனா்.

இந்தப் போராட்டத்துக்கு தமிழ்நாடு தீண்டாமை ஒழிப்பு முன்னணியின் மாவட்டத் தலைவா் எம். பாலசுப்பிரமணியம் தலைமை வகித்தாா். புகா் மாவட்டத் தலைவா் எம். கண்ணன், மாவட்டச் செயலா் மாரிக்கனி, இந்திய ஜனநாயக வாலிபா் சங்க மாவட்டத் தலைவா் ஜி. செல்வா, மாவட்டச் செயலா்கள் எஸ். வேல்தேவா (மாநகா்), எஸ். சுதா்சன் (புகா்), ஜனநாயக மாதா் சங்க மத்திய குழு உறுப்பினா் ஆா்.சசிகலா, மாவட்டத் தலைவா்கள் ஆா். லதா (மாநகா்), என். விஜயா (புகா்), செயலா்கள் வை. ஜென்னியம்மாள், எஸ். சரஸ்வதி, இந்திய மாணவா் சங்க மாநகா் மாவட்டத் தலைவா் டீலன் ஜெஸ்டின், செயலா் டேவிட் ராஜதுரை உள்ளிட்ட நிா்வாகிகள், உறுப்பினா்கள் பங்கேற்றனா்.

போராட்டத்தில் ஈடுபட்ட 70 பேரை போலீஸாா் கைது செய்து, மாலையில் விடுவித்தனா்.