கூடுதல் விலைக்கு உரம் விற்பதை தடுக்க கண்காணிப்புக் குழுக்கள் அமைப்பு

ராமநாதபுரம் மாவட்டத்தில் உரங்கள் கூடுதல் விலைக்கு விற்பதை தடுக்க 4 கண்காணிப்புக் குழுக்கள் அமைக்கப்பட்டிருப்பதாக மாவட்ட ஆட்சியர் கொ.வீரராகவராவ் தெரிவித்துள்ளார்.
இது தொடர்பாக அவர் வெளியிட்டுள்ள செய்திக்குறிப்பு: ராமநாதபுரம் மாவட்டத்தில் வேளாண் சாகுபடி பணிகள் தற்போது நடந்து வருவதுடன் ஒரு சில கிராமங்களில் விதைப்பு பணிகளும் மேற்கொள்ளப்பட்டு வருகின்றன. ராமநாதபுரம் மாவட்ட விவசாயிகளுக்கு தேவையான உரங்கள் தொடக்க வேளாண் கூட்டுறவுச் சங்கங்களிலும், தனியார் உர விற்பனை நிறுவனங்களிலும் இருப்பு வைக்கப்பட்டுள்ளன. தற்போது யூரியா 2015 மெ. டன், டி.ஏ.பி.841 மெ.டன், பொட்டாஷ் 135 மெ.டன், கலப்பு உரங்கள் 826 மெ.டன், சூப்பர் பாஸ்பேட் 30 மெ.டன் ஆக மொத்தம் 3847 மெ.டன் உரங்கள் விவசாயிகளுக்கு தேவையான அளவு இருப்பு வைக்கப்பட்டுள்ளது. அரசு நிர்ணயித்த விலையை விட அதிக விலைக்கு உரங்கள் விற்பனை செய்வதை கண்காணிக்க 4 கண்காணிப்புக் குழுக்கள்  அமைக்கப்பட்டுள்ளது.
இக்கண்காணிப்புக் குழுவானது ராமநாதபுரம் மாவட்டத்தில் உள்ள உர விற்பனை நிலையங்களை ஆய்வு செய்து உர இருப்பு  விபரம் மற்றும் விற்பனை விலை விவரம் தகவல் பலகையில் பொதுமக்கள் பார்வைக்கு வைக்கப்பட்டிருக்கிறதா எனவும், உர மூட்டைகளில் அச்சடிக்கப்பட்டுள்ள அதிகபட்ச விலைக்கு மிகாமல் விற்பனை செய்யப்படுகிறதா எனவும் கண்காணிக்க குழுவுக்கு அறிவுரைகள் வழங்கப்பட்டுள்ளது. 
உரங்களை அரசு நிர்ணயித்த விலைக்கு கூடுதலாக விற்பனை செய்தால் கடும் நடவடிக்கை எடுக்கப்படும் என அச்செய்திக்குறிப்பில் தெரிவிக்கப்பட்டுள்ளது.