ஜாதிச் சான்றிதழ் வழங்கக் கோரி மாவட்ட ஆட்சியா் அலுவலகம் முற்றுகை

ஜாதிச் சான்றிதழ் கோரி, சிவகங்கை மாவட்ட ஆட்சியா் அலுவலகத்தை காட்டு நாயக்கா் சமுதாய மக்கள் புதன்கிழமை முற்றுகையிட்டுப் போராட்டத்தில் ஈடுபட்டனா்.

சிவகங்கை மாவட்டம், காரைக்குடி பாப்பா ஊருணி பகுதியில் வசித்து வரும் காட்டு நாயக்கா் சமுதாயத்தைச் சோ்ந்த 153 குடும்பங்கள், கடந்த 20 ஆண்டுகளுக்கும் மேலாக ஜாதி சான்றிதழ் வழங்குமாறு அரசிடம் வலியுறுத்தி வருகின்றனா். ஆனால், நீலகிரி மாவட்டத்தை பூா்வீகமாகக் கொண்ட இவா்களது உறவினா்களுக்கு மதுரை, விருதுநகா், தூத்துக்குடி உள்ளிட்ட மாவட்டங்களில் காட்டுநாயக்கா் ஜாதிச் சான்றிதழ் வழங்கப்பட்டுள்ளதாகவும், அதேபோல சிவகங்கை மாவட்டத்திலும் சான்றிதழ் வழங்க வேண்டுமென வலியுறுத்தி இந்தப் போராட்டத்தில் ஈடுபட்டனா். அப்போது வெயிலின் தாக்கத்தால் அண்ணாதுரை என்பவா் மயங்கி விழுந்ததால் பரபரப்பு ஏற்பட்டது.

இதையடுத்து சமுதாயப் பிரதிநிதிகள் குழுவினரிடம் சிவகங்கை மாவட்ட ஆட்சியா் ப. ஆகாஷ் பேச்சுவாா்த்தை நடத்தினாா்.

அப்போது, காட்டு நாயக்கன் ஜாதிச் சான்றிதழ் தொடா்பான முந்தைய நிராகரிப்பு உத்தரவை மறுபரிசீலனை செய்ய வேண்டுமென வலியுறுத்தப்பட்டது. புதிதாகப் பொறுப்பேற்றுள்ள சாா் ஆட்சியா் மூலம் மக்களின் கருத்துகளைக் கேட்டறிந்து, விரிவான விசாரணை நடத்தப்படும். இதையடுத்து, இறுதி முடிவு எடுக்கப்படும் என ஆட்சியா் தெரிவித்தாா். இதை ஏற்றுக்கொண்ட அவா்கள் போராட்டத்தைக் கைவிட்டு கலைந்து சென்றனா்.

இந்தப் போராட்டம் காரணமாக மாவட்ட ஆட்சியா் அலுவலகப் பகுதியில் ஏராளமான போலீஸாா் குவிக்கப்பட்டதால் சுமாா் 2 மணி நேரம் பரபரப்பான சூழல் நிலவியது.