ஸ்ரீவில்லிபுத்தூர் ஒருங்கிணைந்த மாவட்ட நீதிமன்றத்தில் கூடுதல் மாவட்ட, சார்பு நீதிமன்றங்கள் திறப்பு

விருதுநகர் மாவட்டம்  ஸ்ரீவில்லிபுத்தூரில் ஒருங்கிணைந்த மாவட்ட நீதிமன்ற வளாகத்தில் அமைக்கப்பட்டுள்ள கூடுதல் மாவட்ட நீதிமன்றம், கூடுதல் சார்பு நீதிமன்றங்களை மாவட்ட முதன்மை அமர்வு நீதிபதி ஆ.முத்துசாரதா புதன்கிழமை திறந்து வைத்தார்.
பின்னர் நீதிபதி பேசியதாவது: விரைவான நீதி மக்களைச் சென்றடைய இந்த இரு நீதிமன்றங்களும் அமைக்கப்பட்டுள்ளது. இதனால் முதன்மை மாவட்ட நீதிமன்றம் மற்றும் முதன்மை சார்பு நீதிமன்றத்தில் நிலுவையில் உள்ள வழக்குகள் விரைவாக முடிவுக்கு வரும். 
ஸ்ரீவில்லிபுத்தூரில் உள்ள மாவட்ட ஒருங்கிணைந்த நீதிமன்றத்தில் வழக்குரைஞர்களும், வழக்காடிகளும் இரண்டாம் தளத்திற்கு சிரமம் இல்லாமல் சென்று வர சாய்தளப் பாதை அமைக்கப்படவுள்ளது. மேலும் நீதிமன்றங்களில் விரைவில் ஒலிபெருக்கி வசதியும் செய்து தரப்படும். சிவகாசி மற்றும் ராஜபாளையத்தில் கட்டடப்பட்டு வரும் புதிய நீதிமன்றத்துக்கான கட்டுமானப் பணிகள் 2 மாதங்களுக்குள் நிறைவு பெற்று திறக்கப்படும். ஸ்ரீவில்லிபுத்தூரில் உள்ள மாவட்ட நீதிமன்ற வளாகத்தில் விரைவில் வன்கொடுமை தடுப்பு சிறப்பு நீதிமன்றம் திறக்க நடவடிக்கை எடுக்கப்பட்டுள்ளது என்றார் அவர்.
விழாவில் விருதுநகர் மாவட்ட ஆட்சியர் அ. சிவஞானம், மாவட்ட காவல் கண்காணிப்பாளர் எம்.ராஜராஜன், மாவட்ட சட்டப் பணிகள் ஆணைக் குழுச் செயலாளர் நீதிபதி ஜெ.கிறிஸ்டல் பபிதா,  ஸ்ரீவில்லிபுத்தூர் வழக்குரைஞர் சங்கத் தலைவர் டி.கதிரேசன், செயலாளர் திருமலையப்பன் உள்ளிட்டோர் கலந்து கொண்டனர். மாவட்ட தலைமை குற்றவியல் நீதித்துறை நடுவர் டி.சம்பத்குமார் நன்றி கூறினார்.