விநாயகர் சிலைகள் பிரதிஷ்டை செய்து வழிபாடு

விநாயகர் சதுர்த்தியையொட்டி, காரைக்காலில் பல்வேறு இடங்களில் விநாயகர் சிலை பிரதிஷ்டை செய்யப்பட்டு வழிபாடுகள் தொடங்கியுள்ளது. 
விநாயகர் சதுர்த்தியையொட்டி காரைக்கால் மாவட்டத்தில் பல்வேறு இடங்களில் விநாயகர் சிலை பிரதிஷ்டை செய்யப்பட்டு சதுர்த்தி நாளிலும், அடுத்த சில நாள்களில் கடலிலும், ஆற்றிலும் கரைக்கும் வழக்கம் நடைமுறையில் உள்ளது. இந்து முன்னணி சார்பில் காரைக்கால் நகரப் பகுதியில் 52 இடங்களில் விநாயகர் சிலை சதுர்த்தி நாளான வியாழக்கிழமை பிரதிஷ்டை செய்யப்பட்டது. இதேபோல், திருமலைராயன்பட்டினத்தில் 32 இடங்களில் விநாயகர் சிலை பிரதிஷ்டை செய்யப்பட்டுள்ளது.  இவை மட்டுமன்றி பொதுமக்கள் பல்வேறு அமைப்புகள் சார்பில் சுமார் 50-க்கும் மேற்பட்ட இடங்களில் விநாயகர் சிலை வைத்து வழிபாடு வியாழக்கிழமை தொடங்கியது. 
இந்து முன்னணி மற்றும் ஸ்ரீசக்தி விநாயகர் மத்தியக் கமிட்டி சார்பில் காரைக்கால் ஸ்ரீஏழை மாரியம்மன் கோயில் வாயிலில் வியாழக்கிழமை பிரதிஷ்டை செய்யப்பட்ட ஸ்ரீசக்தி விநாயகருக்கு சிறப்பு பூஜைகள் செய்யப்பட்டன.  மாலை நிகழ்ச்சியாக, திருமுறை பாராயணம், ஆன்மிகச் சொற்பொழிவு நடைபெற்றது. செப். 14-ஆம் தேதி காலை 10 மணிக்கு மகா கணபதி ஹோமம், மாலை வேத பாராயணம், ஆன்மிகச் சொற்பொழிவு நடைபெறவுள்ளது. சிலைகள் வழிபாட்டுக்கு வைக்கப்பட்டிருக்கும் இடங்களில் வாழை மரங்கள், தோரணங்கள் கட்டப்பட்டு, ஒலிபெருக்கி மூலம் விநாயகர் பாடல் ஒலிக்கச் செய்யப்பட்டுள்ளன. பொதுமக்கள் பலரும் தங்களது வீட்டில் தயாரித்த கொழுக்கட்டை, மோதகம் உள்ளிட்டவற்றை கொண்டு சென்று, சிலைகள் முன்பு வைத்து வழிபாடு செய்தனர். இந்து முன்னணி சார்பில் வைக்கப்பட்டிருக்கும் சிலைகள் செப். 15-ஆம் தேதி பகல் 12 மணியளவில் ஏழை மாரியம்மன் கோயில் பகுதியில் ஒருங்கிணைக்கப்பட்டு, ஊர்வலமாக எடுத்துச் செல்லப்பட்டு கிளிஞ்சல்மேடு கடற்கரையில் கரைக்க ஏற்பாடுகள் செய்யப்பட்டுள்ளது. மாவட்டத்தில் பல்வேறு அமைப்புகள் சார்பில் பிரதிஷ்டை செய்யப்பட்ட சிலைகள், வெவ்வேறு நாள்களில் ஆறு, கடலில் கரைக்க ஏற்பாடுகள் செய்யப்பட்டுள்ளன.