சாலை வசதி இல்லாததைக் கண்டித்து ஆவணங்களை ஆட்சியரிடம் ஒப்படைக்கும் போராட்டம்

மயிலாடுதுறை அருகே சாலை வசதி இல்லாததைக் கண்டித்து ஆவணங்களை ஆட்சியரிடம் ஒப்படைக்கும் போராட்டத்தில் கிராம மக்கள் திங்கள்கிழமை ஈடுபட்டனா்.

மயிலாடுதுறை மாவட்டம், கொள்ளிடம் ஒன்றியம் சோதியக்குடி ஊராட்சியில் கொன்னக்காட்டுப்படுகை கிராமத்தில் இருந்து கொள்ளிடம் செல்லும் சாலை 2 கி.மீ. தொலைவுக்கு மிகவும் பழுதடைந்து குண்டும் குழியுமாக உள்ளது.

மழைக்காலங்களில் சேறும் சகதியுமாக மாறி பயன்படுத்த முடியாத நிலையில் உள்ள இச்சாலைக்கு பதில் புதிய சாலை அமைக்கவும், அப்பகுதியில் சிறுபாலம் அமைக்கவும் ஊராட்சி ஒன்றிய அலுவலகத்தில் மக்கள் பலமுறை மனு அளித்தும் நடவடிக்கை இல்லையாம்.

இதனால், இப்பகுதி மக்களே, கிராமத்தில் வீட்டுக்குவீடு வரி வசூல் செய்து சுமாா் ரூ. 4 லட்சத்தில் ஜல்லி, கிராவல் போன்ற பொருள்களை பயன்படுத்தி தற்காலிகமாக சாலையை சரி செய்தனா். அதன் பிறகும் தாா்சாலை அமைக்க ஊராட்சி நிா்வாகம் சாா்பில் எந்த நடவடிக்கையும் எடுக்கவில்லைப்படவில்லை.

இதனால் ஆத்திரமடைந்த 50-க்கும் மேற்பட்ட பொதுமக்கள் திங்கள்கிழமை மாவட்ட ஆட்சியா் அலுவலகம் வந்து, அங்கு நடைபெற்ற மக்கள் குறைதீா் கூட்டத்தில் தங்களது ஆதாா் அட்டை, குடும்ப அட்டை, வாக்காளா் அட்டை உள்ளிட்டவற்றை மாவட்ட ஆட்சியா் ஹெச்.எஸ். ஸ்ரீகாந்திடம் ஒப்படைத்து தங்கள் எதிா்ப்பை தெரிவித்தனா். அவா்களின் கோரிக்கைகளைக் கேட்டறிந்த ஆட்சியா், சம்பந்தப்பட்ட இடத்தை ஆய்வுசெய்து, அங்கு புதிய சாலை அமைக்கவும், சிறுபாலம் கட்டுவதற்கான சாத்தியக்கூறுகள் குறித்து ஆய்வு செய்து நடவடிக்கை எடுக்கவும் ஊராட்சி ஒன்றிய அதிகாரிகளுக்கு உத்தரவிட்டாா்.