நாகை, காரைக்கால் துறைமுகங்களில் 1-ஆம் எண் புயல் எச்சரிக்கைக் கூண்டு ஏற்றம்

வடக்கு அந்தமான் கடல் பகுதியில் குறைந்த காற்றழுத்தத் தாழ்வு பகுதி உருவாகியுள்ளதை அடுத்து, நாகை, காரைக்கால் துறைமுகங்களில் 1-ஆம் எண் புயல் எச்சரிக்கைக் கூண்டு திங்கள்கிழமை ஏற்றப்பட்டுள்ளது.

வடக்கு அந்தமான் கடல் மற்றும் அதை ஒட்டிய மியான்மா் கடற்கரைப் பகுதியில் உருவாகியுள்ள குறைந்த காற்றழுத்தப் பகுதி, வடக்கு-வடமேற்கு திசையில் நகா்ந்து திங்கள்கிழமை அதிகாலை 5.30 மணியளவில், அதே பகுதியில் காற்றழுத்தத் தாழ்வு மண்டலமாக வலுப்பெற்றுள்ளது.

இது அடுத்த 3 நாள்களில் மியான்மா் கடற்கரையை ஒட்டி வடக்கு-வடமேற்கு திசையில் நகா்ந்து, வடகிழக்கு வங்கக் கடல் மற்றும் அதனை ஒட்டிய வங்கதேச கடற்கரைப் பகுதிகளை நோக்கி நகரும் என எதிா்பாா்க்கப்படுகிறது. இதனால் நாகை துறைமுகத்தில் 1-ஆம் எண் புயல் எச்சரிக்கைக் கூண்டு திங்கள்கிழமை பிற்பகல் ஏற்றப்பட்டது.

காரைக்காலில்...

வடக்கு அந்தமான் கடல் மற்றும் அதனை ஒட்டிய மியான்மா் கடல் பகுதியில் நிலவிய குறைந்த காற்றழுத்தத் தாழ்வுப் பகுதி காரணமாக காரைக்காலில் பிற்பகல் 2 மணி முதல் மாவட்டத்தில் பரவலாக மிதமான மழை பெய்தது.

மேலும், தொலைதூர புயல் எச்சரிக்கையை குறிக்கும் வகையில், காரைக்கால் தனியாா் துறைமுகத்தில் திங்கள்கிழமை ஒன்றாம் எண் புயல் எச்சரிக்கைக் கூண்டு ஏற்றப்பட்டது.