விநாயகர் சதுர்த்தியையொட்டி கோயில்களில் சிறப்பு வழிபாடு

திருவாரூர் கோயில்களில் விநாயகர் சதுர்த்தியையொட்டி, வியாழக்கிழமை சிறப்பு வழிபாடு நடைபெற்றது.
விநாயகர் சதுர்த்தி ஆண்டுதோறும் ஆவணி மாத அமாவாசையை அடுத்த சதுர்த்தியில் கொண்டாடப்படுகிறது. விநாயகரின் பிறந்த நாளாக கொண்டாடப்படும் இந்நாளில், பிள்ளையார் சிலைகளுக்கு எருக்கம் பூ அணிவித்து, அருகம்புல், செவ்வந்தி, மல்லிகை, அரளி போன்ற மலர்களால் அர்ச்சனை செய்வது வழக்கம். விநாயகருக்கு விருப்பமான கொழுக்கட்டை, அப்பம், சுண்டல், வடை, அவல், பொரி என நிவேதனங்கள் அவருக்கு படைக்கப்படும். மேலும், வாழை, நாவல், விளாம்பழம் உள்ளிட்டவையும் படைக்கப்பட்டு வழிபாடு நடத்தப்படுவது வழக்கம். விநாயகர் சதுர்த்தியையொட்டி, திருவாரூரில் உள்ள விநாயகர் கோயில்களில் சிறப்பு வழிபாடு நடைபெற்றது. இதில், திரளான பக்தர்கள் பங்கேற்று, விநாயகருக்கு வழிபாடு நடத்தினர்.