விண்வெளித்துறை தனியாா்மயமாகாது: இஸ்ரோ முன்னாள் தலைவா் சிவன்

இந்திய விண்வெளித்துறை தனியாா்மயமாகாது என்றாா் இஸ்ரோ முன்னாள் தலைவா் கே.சிவன்.

வடக்கன்குளம் எஸ்.ஏ.வி. சகாயத்தாய் மகளிா் கலை அறிவியல் கல்லூரி பட்டமளிப்பு விழா வியாழக்கிழமை நடைபெற்றது. இதில், சிறப்பு விருந்தினராக பங்கேற்ற அவா், 97 மாணவிகளுக்கு பட்டங்களை வழங்கினாா். பின்னா், செய்தியாளா்களிடம் அவா் கூறியதாவது: விண்வெளி சாா்ந்த செயல்பாடுகளில் இஸ்ரோ மட்டுமன்றி தனியாா் நிறுவனங்கள் மற்றும் கல்வி நிறுவனங்களும் அதிகளவில் தங்களை ஈடுபடுத்தி வருகின்றன. இதனால், இந்திய விண்வெளித் துறையானது மற்ற நாடுகளை விட பல மடங்கு முன்னேறிச் சென்று சாதனைகளைப் படைப்பதற்கான வாய்ப்புகள் பிரகாசமாக உள்ளன. பூமியின் வளங்கள் குறைந்து வருகின்றன. ஆனால், தேவைகள் அதிகரித்து வருகின்றன.

எனவே, சந்திரன் மற்றும் செவ்வாய் கிரகங்களில் இருக்கின்ற வளங்களை மனிதா்கள் பயன்படுத்தும் வகையில் தீவிர ஆராய்ச்சி மேற்கொள்ளப்பட்டு வருகிறது.

உலகில் பெரும்பாலான விஞ்ஞான வளா்ச்சிமிகுந்த நாடுகள் இதற்கான முயற்சியில் ஈடுபட்டு வருகின்றன.

செயற்கை நுண்ணறிவு (ஏஐ) தொழில்நுட்பம் அசுர வேகத்தில் வளா்ந்தாலும், கணிதம், இயற்பியல், வேதியியல் மற்றும் பொறியியல் போன்ற அடிப்படைக் கல்வியின் முக்கியத்துவம் என்றும் துறையாது. இந்த அறிவியல் அடிப்படை இல்லாமல் எதுவும் நடக்கமுடியாது.

தற்போதைய கல்வி முறையில் புதுமைகளை புகுத்தி மதிப்புகள் சாா்ந்த கல்வியை மாணவா்களுக்கு வழங்க வேண்டும்.

உலகளவில் விண்வெளித் தேவைகள் பலமடங்கு அதிகரித்து வருவதால் இஸ்ரோ மட்டுமே அனைத்தையும் செய்துவிட முடியாது. விண்வெளித் துறையில் தனியாா் மற்றும் கல்வி நிறுவனங்களுக்குத் வாய்ப்பு கொடுப்பது, இந்தியாவின் திறனை முழுமையாக வெளிக்கொண்டு வரும் நடவடிக்கையே தவிர, விண்வெளித்துறையை தனியாா்மயமாக்குதல் என்று பொருளல்ல.

விண்வெளித் துறை என்பது ஏரோ ஸ்பேஸ் படித்தவா்களுக்கு மட்டுமே என்ற தவறான பாா்வை நிலவுகிறது. மெக்கானிக்கல், எலக்ட்ரானிக்ஸ், கணினி அறிவியல், கலை, அறிவியல் பயின்ற அனைத்து மாணவா்களுக்கும் இதில் சமமான வேலைவாய்ப்புகள் உள்ளன.

நமது இளைஞா்களின் திறமையைச் சரியாகப் பயன்படுத்தினால் உலக விண்வெளித் துறையில் இந்தியா தொடா்ந்து முதன்மை இடத்தைப் பிடிக்கும்.

இந்தியா அடுத்த 5 அல்லது 10 ஆண்டுகளில் எவ்வாறு வளா்ச்சி பெற வேண்டும் என்று திட்டமிடும்போது, விண்வெளித் துறையின் பங்களிப்பு மிக முக்கியமானதாக இருக்கும். இத்துறைக்கு மகத்தான எதிா்காலம் உள்ளதோடு, பிற தொழில்நுட்பப் பயன்பாடுகளுக்கு ஒரு வழிகாட்டும் மையமாகவும் திகழும் என்றாா் அவா். விழாவுக்கு எஸ்.ஏ.வி.கல்விக்குழுமங்களின் தலைவா் ம.கிரகாம்பெல் தலைமை வகித்தாா். தாளாளா் ம.திவாகரன் முன்னிலை வகித்தாா். முதல்வா்( பொறுப்பு) வேல்விழி நன்றி கூறினாா்.