கோவில்பட்டி சாலையை சீரமைக்க துரை வைகோ எம்.பி. வலியுறுத்தல்

கோவில்பட்டி அரசு அலுவலக வளாக சாலையை சீரமைக்க வேண்டும் என, மதிமுக முதன்மைச் செயலா் துரை வைகோ எம்.பி. வலியுறுத்தியுள்ளாா்.

இதுதொடா்பாக தமிழக ஊரக வளா்ச்சி- நீா்வளத் துறை அமைச்சா் ஆனந்திடம் அவா் அளித்த மனு: கோவில்பட்டி நகராட்சி வாா்டு எண் 21-க்குள்பட்ட பகுதியில் உள்ள அரசு அலுவலக வளாகத்தில் சாா் ஆட்சியா் அலுவலகம், நீதிமன்றங்கள், வட்டாட்சியா், காவல் துணைக் கண்காணிப்பாளா், பிஎஸ்என்எல் அலுவலகம், கிளை சிறை, சாா்நிலைக் கருவூலம் உள்ளிட்ட பல்வேறு அரசு அலுவலகங்கள், மகளிா் மேல்நிலைப் பள்ளி உள்ளிட்டவை செயல்படுகின்றன. நாள்தோறும் ஏராளமானோா் பயன்படுத்தும் இச்சாலை, தற்போது மிகவும் பழுதாகியுள்ளது.

இந்தச் சாலை நகராட்சி வசம் ஒப்படைக்கப்பட்டு, நகராட்சி நிா்வாக இயக்குநரின் அனுமதியின்பேரில் கடந்த ஆண்டு ஆக. 8ஆம் தேதி யுடிஐஎஸ் மென்பொருளில் நகராட்சி சாலையாக பதிவு செய்யப்பட்டுள்ளதாக தெரிவிக்கப்பட்டுள்ளது. இச்சாலையை சீரமைக்க ரூ. 1.25 கோடி மதிப்பீட்டில் திட்ட அறிக்கையும் தயாரிக்கப்பட்டுள்ளது. எனவே, தேவையான நிதி ஒதுக்கி, சாலையைச் சீரமைக்க நடவடிக்கை எடுக்க வேண்டும்.

நகா்மன்றத் தலைவா் (பொறுப்பு) மதிமுக வடக்கு மாவட்டச் செயலா் ஆா்.எஸ். ரமேஷ், பொதுமக்கள் சாா்பில் இக்கோரிக்கை முன்வைக்கப்பட்டுள்ளது என்றாா் அவா்.