முதல்வா் கோப்பை விளையாட்டு: போட்டிகளில் வென்ற மாற்றுத்திறன் வீரா்களுக்கு பதக்கம் வழங்கல்

அரியலூா் மாவட்ட விளையாட்டு அரங்கில், , தமிழ்நாடு விளையாட்டு மேம்பாட்டு ஆணையம் சாா்பில், மாவட்ட அளவில் நடைபெற்ற தமிழ்நாடு முதல்வா் கோப்பைக்கான மாற்றுத்திறனாளிகள் விளையாட்டுப் போட்டிகளில் வென்ற வீரா், வீராங்கனைகளுக்கு வியாழக்கிழமை மாலை பதக்கம் மற்றும் பாராட்டுச் சான்றிதழ்கள் வழங்கப்பட்டன.

இதற்காக நடைபெற்ற விழாவில், கலந்து கொண்ட ஆட்சியா் ந. மிருணாளினி, தடகளம், இறகுப்பந்து, சக்கர நாற்காலி மேசைப் பந்து, கையுந்து பந்து, எறிபந்து, கபடி ஆகிய விளையாட்டுப் போட்டிகளில் வென்ற 147 மாற்றுத்திறன் வீரா், வீராங்கனைகளுக்கு பதக்கம் மற்றும் பாராட்டுச் சான்றிதழ்களை வழங்கி, மாற்றுத்திறன் குழந்தைகளுக்கு பெற்றோா்கள் தரும் ஆதரவு மிக முக்கியமானதாகும். எனவே, இத்தகைய வாய்ப்புகளை விளையாட்டு வீரா், வீராங்கனைகள் நல்ல முறையில் பயன்படுத்திக் கொண்டு போட்டிகளில் கலந்துகொண்டு வெற்றிப் பெற்று அரியலூா் மாவட்டத்துக்கு பெருமை சோ்க்க வேண்டும். மேலும், உடல் ஆரோக்கியத்தையும், மன ஆரோக்கியத்தையும் பெற வேண்டும் என்று தெரிவித்தாா்.

விழாவில், மாவட்ட விளையாட்டு மற்றும் இளைஞா் நலன் அலுவலா் லெனின், மாவட்ட முதன்மைக் கல்வி அலுவலா் ரேணுகோபால், மாற்றுத்திறனாளிகள் நல அலுவலா் ஜானகிராமன் மற்றும் மாற்றுத்திறன் வீரா், வீராங்கனைகள் உள்ளிட்டோா் கலந்துகொண்டனா்.