கரூரில் 25 குழந்தைகளுக்கு ‘தாய்மாமன் தங்க மோதிரம்’ அமைச்சா் வழங்கினாா்

கரூரில், தாய்மாமன் தங்க மோதிரம் திட்டத்தின் கீழ் 25 குழந்தைகளுக்கு தங்க மோதிரத்தை பால்வளத்துறை அமைச்சா் விஜயலட்சுமி சின்னசாமி திங்கள்கிழமை வழங்கினாா்.

கரூரில் தாய்மாமன் தங்க மோதிரம் திட்டத்தின் கீழ் பயனாளிகளுக்கு தங்க மோதிரம் வழங்கும் நிகழ்ச்சி, முதல்வா் கோப்பை விளையாட்டுப் போட்டிகளில் வெற்றி பெற்ற வீரா், வீராங்கனைகளுக்கு பரிசுத் தொகைகளை வழங்கும் நிகழ்ச்சி, 4 புதிய வளா்ச்சித் திட்டப் பணிகளை பொதுமக்கள் பயன்பாட்டுக்கு திறந்து வைக்கும் நிகழ்ச்சி ஆகியன திங்கள்கிழமை மாலையில் கரூா் அரசு மருத்துவக்கல்லூரி அரங்கில் நடைபெற்றது.

நிகழ்ச்சிக்கு மாவட்ட ஆட்சியா் சி.முத்துக்குமரன் தலைமை வகித்தாா். பால் மற்றும் பால்வள மேம்பாட்டுத் துறை அமைச்சா் விஜயலட்சுமி சின்னசாமி பங்கேற்று, தாய் மாமன் தங்க மோதிரம் திட்டத்தின் கீழ் 25 குழந்தைகளுக்கு தலா 1 கிராம் தங்க மோதிரம், முதலமைச்சா் கோப்பை விளையாட்டுப் போட்டிகளில் வெற்றிபெற்ற 2,718 வீரா், வீராங்களைகளுக்கு ரூ. 54.36 லட்சம் மதிப்பீட்டில் பரிசுத் தொகைகளை வழங்கினாா்.

முன்னதாக, பால்வளத்துறையின் சாா்பில் தோகைமலை ஊராட்சி ஒன்றியம், ஆண்டிக்கவுண்டன்பட்டியில் ரூ.29.16 லட்சம் மதிப்பில் புதிதாக கட்டப்பட்டுள்ள 5,000 லிட்டா் கொள்ளளவு கொண்ட தொகுப்புப் பால் குளிரூட்டும் நிலையம் ,

வருவாய்த்துறை சாா்பில் அரவக்குறிச்சி வட்டம், சின்னதாராபுரத்தில் ரூ.35 லட்சம் மதிப்பில் புதிதாக கட்டப்பட்டுள்ள வருவாய் ஆய்வாளா் குடியிருப்புடன் கூடிய அலுவலகக் கட்டடத்தை அமைச்சா் திறந்து வைத்தாா்.

மேலும், குந்தாணிபாளையம், எருமாா்பட்டியில் புதிதாக கட்டப்பட்டுள்ள 2 கிராம அறிவுசாா் மையத்துக்கான ஆணைகளையும், விபத்தில் உயிரிழந்த 7 தொழிலாளா்களின் குடும்பங்களுக்கு ரூ.29.15 லட்சம் மதிப்பிலான நிதியுதவிகளையும் அமைச்சா் வழங்கினாா்.

நிகழ்ச்சியில், மாநகராட்சி ஆணையா் எம்.பிருத்விராஜ் , கரூா் சாா்- ஆட்சியா் ரா.வெங்கடேஷ்வரன், அரசு மருத்துவக் கல்லூரி முதல்வா் ம.பாரதி மோகன், மாவட்ட சுகாதார அலுவலா் ஆ.சுப்ரமணி உள்ளிட்டோா் கலந்துகொண்டனா்.