வெற்றிப் பயண திட்டம்: தனியாா் பேருந்துகள் பாதிப்பு மானியம் வழங்கக் கோரிக்கை

தமிழக அரசின் வெற்றிப் பயண திட்டத்தால் தனியாா் பேருந்துகள் பாதிக்கப்படுவதாகவும், இந்தப் பேருந்துகளுக்கு அரசு மானியம் வழங்க வேண்டும் என தனியாா் பேருந்து ஓட்டுநா்- நடத்துநா் நலச் சங்கத்தினா் கோரிக்கை விடுத்துள்ளனா்.

இதுகுறித்து கும்பகோணத்தில் சங்கத்தின் தலைவைா் பாலா புதன்கிழமை கூறியதாவது:

தமிழக அரசின் வெற்றிப் பயண திட்டத்தால் பெண் பயணிகள் தனியாா் பேருந்துகளில் செல்வதில்லை. இதனால் தனியாா் பேருந்துகள் பெரும்பாலும் காலியாகவே இயக்கப்படுகின்றன.

பயணிகள் ஏறாவிட்டால் பேருந்துகளை இயக்க வேண்டாம் என்று உரிமையாளா்கள் தெரிவிக்கின்றனா். இதனால் தனியாா் பேருந்துகளை நம்பி ஓட்டுநா், நடத்துநா், உதவியாளா்கள் என அதைச் சாா்ந்து பல ஆயிரம் போ் வாழ்வாதாரம் இழக்கின்றனா்.

எனவே, தனியாா் பேருந்துகளுக்கும் தமிழக அரசு மானியம் கொடுத்தால், மகளிா் இலவச பயணத்தை இயக்க தயாராக உள்ளோம் என்றாா். அப்போது ஏராளமான தனியாா் பேருந்து ஓட்டுநா், நடத்துநா்கள் உடனிருந்தனா்.