தலைக்கவச விழிப்புணர்வுப் பேரணி

மணப்பாறையில் மழைநீர் சேமிப்பு, தலைக்கவச விழிப்புணர்வுப் பேரணி புதன்கிழமை நடைபெற்றது. 
மணப்பாறையில் ஜூனியர் சேம்பர் இண்டர்நேஷனல் அமைப்பின் வார விழாவை முன்னிட்டு, சமுதாய விழிப்புணர்வு, தனி மனித திறமை மேலோங்க கருத்தரங்கங்கள் உள்ளிட்டவை  நடத்தப்பட்டு வருகிறது. அதன் ஒருபகுதியாக போக்குவரத்துக் காவல்துறையுடன் இணைந்து மழைநீர் சேமிப்பு, தலைக்கவச விழிப்புணர்வுப் பேரணி பேருந்து நிலையம் அருகேயுள்ள பெரியார் சிலையில் தொடங்கியது. இதனை போக்குவரத்து காவல் ஆய்வாளர் பாண்டிவேல் தொடக்கி வைத்தார். 
ஜெ.சி.ஐ தலைவர் கணேஷ் ராஜா தலைமை வகித்தார். கல்லூரி முதல்வர் பாஸ்கரன் முன்னிலை வகித்தார்.
இந்தப் பேரணி முக்கிய வீதிகள் வழியாகச் சென்று தனியார் கல்லூரியில் நிறைவுற்றது. பேரணியில் பங்கேற்ற தனியார் கல்லூரி மாணவ, மாணவியர் மழைநீர் சேமிப்பு, சாலை விதிகள், தலைக்கவசம் அணிவதன் அவசியம் குறித்த வாசகங்கள் அடங்கிய பதாகைகளை கைகளில் ஏந்திச் சென்றனர்.