அடையாளம் தெரியாத வாகனம் மோதியதில் சாலையில் நடந்து சென்றவா் உயிரிழப்பு

திருச்சியில் அடையாளம் தெரியாத வாகனம் மோதியதில் சாலையில் நடந்துசென்றவா் திங்கள்கிழமை உயிரிழந்தாா்.

திருச்சி இபி சாலை கருவாட்டுப்பேட்டையைச் சோ்ந்தவா் க. புதியமாறன் (45). இவா், திங்கள்கிழமை இரவு இபி சாலையில் நடந்துசென்றுகொண்டிருந்தாா். அந்தச் சாலையில் உள்ள அம்மா உணவகம் அருகே நடந்து சென்றுகொண்டிருந்தபோது, பின்னால் வந்த அடையாளம் தெரியாத வாகனம் மோதியதில் புதியமாறனின் தலையில் பலத்த காயம் ஏற்பட்டது. விபத்தை ஏற்படுத்திய வாகனம் நிற்காமல் அங்கிருந்து சென்றுவிட்டது.

இதையடுத்து, அருகிலிருந்தவா்கள் புதியமாறனை மீட்டு திருச்சி அரசு மருத்துவமனைக்கு அனுப்பிவைத்தனா். அங்கு, அவரைப் பரிசோதனை செய்த மருத்துவா்கள் ஏற்கெனவே அவா் உயிரிழந்துவிட்டதாகத் தெரிவித்தனா்.

இதுகுறித்து திருச்சி வடக்குப் போக்குவரத்துப் புலனாய்வுப் பிரிவு போலீஸாா் வழக்குப் பதிந்து விசாரணை நடத்தி வருகின்றனா்.