‘மா’ விவசாயிகள் உற்பத்தியாளரிலிருந்து ஏற்றுமதியாளராக மாற வேண்டும்!

மாம்பழ சாகுபடி விவசாயிகள் உற்பத்தியாளா் எனும் நிலையில் இருந்து ஏற்றுமதியாளராக மாற வேண்டும் என்று வேலூா் மாவட்ட ஆட்சியா் பி.எஸ்.லீலா அலெக்ஸ் தெரிவித்தாா்.

வேலூா் மாவட்டத்தில் 5,924 ஹெக்டோ் பரப்பளவில் மா பயிரிடப்பட்டு, ஆண்டுதோறும் சுமாா் 50,000 மெட்ரிக் டன் மாம்பழம் உற்பத்தி செய்யப்படுகிறது. எனினும், அறுவடை மற்றும் மகசூல் அதிகம் உள்ள காலங்களில் சந்தையில் ஏற்படும் விலை ஏற்றத்தாழ்வுகளால் விவசாயிகள் இழப்பைச் சந்திக்கின்றனா்.

இதனைக் கருத்தில் கொண்டு, விவசாயிகளின் கோரிக்கைக்கு ஏற்ப மா சாகுபடி விவசாயிகளுக்கான மாம்பழ மதிப்பு கூட்டுதல் குறித்த செயல்முறைப் பயிற்சி விரிஞ்சிபுரத்தில் உள்ள வேளாண் அறிவியல் நிலையத்தில் வியாழக்கிழமை நடைபெற்றது. இந்தப் பயிற்சியை மாவட்ட ஆட்சியா் பி.எஸ்.லீலா அலெக்ஸ் வியாழக்கிழமை தொடங்கி வைத்துப் பேசியது:

வேலூா் மாவட்ட விவசாயிகள் மாம்பழ உற்பத்தியில் சிறந்து விளங்குகின்றனா். ஆனால், அந்த உற்பத்தியை முறையாக எப்படி லாபகரமானதாக மாற்றுவது என்பதை விவசாயிகள் தெரிந்துகொள்ள வேண்டும். மாம்பழங்களை கூழ், மாம்பழப் பொடி (ஆம்ச்சூா்), ஊறுகாய், ஜாம் போன்ற மதிப்பு கூட்டுப் பொருள்களாக மாற்றி, சா்வதேச ஏற்றுமதி தரத்துக்கு கொண்டு செல்லும்போது பலமடங்கு கூடுதல் லாபம் ஈட்ட முடியும்.

விவசாயிகளை வெறும் உற்பத்தியாளா்களாக மட்டும் வைத்திருக்காமல், அவா்களை வியாபாரிகளாகவும், ஏற்றுமதியாளா்களாகவும் மாற்றுவதே மாவட்ட நிா்வாகத்தின் நோக்கம். வேளாண் விஞ்ஞானிகள் வழங்கும் நவீனத் தொழில்நுட்ப ஆலோசனைகளை விவசாயிகள் தங்களது நிலங்களில் செயல்படுத்திப் பாா்க்க வேண்டும். மேலும், தங்களுக்குக் கிடைக்கும் இந்த அனுபவங்களை சக விவசாயிகளுடனும் பகிா்ந்து கொண்டு அனைவரும் பயன்பெற வழிவகுக்க வேண்டும் என்றாா்.

முன்னதாக, பயிற்சியின் போது உணவு அறிவியல் விஞ்ஞானிகளால் மாம்பழத்திலிருந்து மதிப்பு கூட்டுப் பொருள்கள் தயாரிப்பது குறித்த நேரடி செயல்முறை விளக்கம் அளிக்கப்பட்டது. விளைபொருள்களை மதிப்பு கூட்டி சந்தைப்படுத்துவதில் சிறப்பாகச் செயல்பட்ட உழவா் உற்பத்தியாளா் நிறுவனத்துக்கு ஆட்சியா் பாராட்டுச் சான்றிதழ்களை வழங்கினாா்.

தொடா்ந்து, வேளாண் அறிவியல் நிலைய வளாகத்தில் பயிரிடப்பட்டுள்ள வம்பன் 11 ரக உளுந்து, கோ 51 ரக நெல் பயிா்களை ஆய்வு செய்த ஆட்சியா், மஞ்சள் தேமல் நோய் எதிா்ப்புத் திறன் கொண்ட ரகங்களை விதை உற்பத்திக்காகப் பெருக்க அறிவுறுத்தினாா். மேலும், முள்கத்திரி, முள்ளில்லா கத்திரி, பகத்தி எலுமிச்சை ரகங்களைப் பாா்வையிட்டு, மரக்கன்றை நட்டு வைத்தாா்.

கால்நடைகளுக்கான அசோலா தீவன உற்பத்தி கூடம் மற்றும் பயிா்களை சேதப்படுத்தும் காட்டுப்பன்றிகளை விரட்டும் செயல்முறை விளக்கத் திடலைத் தொடங்கி வைத்த ஆட்சியா், இயற்கை விவசாயிகளுக்கு ஏடிடி 37 நெல் விதை, அசோலா மற்றும் மண்புழு உரங்களை வழங்கினாா்.

நிகழ்ச்சியில், வேளாண்மைத் துறை இணை இயக்குநா் ஸ்ரீவித்யா, ஆட்சியரின் நோ்முக உதவியாளா் (வேளாண்மை) தேன்மொழி, வேளாண் அறிவியல் நிலைய தலைமை விஞ்ஞானி செந்தில்வேல், தோட்டக்கலைத்துறை துணை இயக்குநா் ஜெரினா பேகம் உள்ளிட்டோா் பங்கேற்றனா்.