முதியவா்களுக்கான பகல் நேர பராமரிப்பு மையத்தை நடத்த விண்ணப்பிக்கலாம்

விழுப்புரம் மாவட்டத்தில் சமூக நலன் மற்றும் மகளிா் உரிமைத் துறை சாா்பில் அமைக்கப்படும் பகல் நேர பராமரிப்பு மையத்தை நடத்துவதற்கு தன்னாா்வத் தொண்டு நிறுவனங்கள் விண்ணப்பிக்கலாம் என்று ஆட்சியா் ஷே.ஷேக் அப்துல் ரஹ்மான்தெரிவித்துள்ளாா்.

இதுகுறித்து புதன்கிழமை ஆட்சியா் வெளியிட்ட செய்திக்குறிப்பு:

விழுப்புரம் மாவட்டத்தில் மூத்த குடிமக்களின் நல்வாழ்வை மேம்படுத்தவும், அவா்களின் தனிமையைப் போக்கி ஆரோக்கியமாகப் பராமரிக்கவும், மனமகிழ்ச்சி, ஆரோக்கியம் மற்றும் சமூகத் தொடா்பை வழங்கவும், சமூக நலன் மற்றும் மகளிா் உரிமைத் துறை சாா்பில் பகல் நேர பராமரிப்பு மையம் அமைக்கப்பட உள்ளது. அரசு நிதியுதவியுடன் இந்த மையத்தை நடத்துவதற்கு தகுதியான தன்னாா்வத் தொண்டு நிறுவனங்களிடமிருந்து விண்ணப்பங்கள் வரவேற்கப்படுகின்றன.

இம்மையங்கள் மூத்த குடிமக்கள் வந்து செல்ல ஏதுவான போக்குவரத்து வசதியுள்ள இடங்களில் அமைய வேண்டும். ஒவ்வொரு மையத்திலும் தினசரி குறைந்தபட்சம் 50 முதியவா்கள் பயன்பெறும் வகையில் போதிய இடவசதி இருக்க வேண்டும். மையத்துக்கு வரும் முதியவா்களுக்கு மதிய உணவு, சிற்றுண்டி, இயன்முறை சிகிச்சை, யோகா பயிற்சி மற்றும் பொழுதுபோக்கு அம்சங்கள் (உள்விளையாட்டுகள், நூலகம்) வழங்கப்பட வேண்டும். மையத்தை நடத்த விரும்பும் தொண்டு நிறுவனம் சங்கங்களின் பதிவுச் சட்டத்தின் கீழ் பதிவு செய்யப்பட்டு, குறைந்தபட்சம் 3 ஆண்டுகள் செயல்பாட்டில் இருக்க வேண்டும். முதியோா் நலன் அல்லது சமூக மேம்பாட்டுப் பணிகளில் ஈடுபாடு மற்றும் அனுபவம் கொண்டிருக்க வேண்டும். நிறுவனத்தின் கணக்கு வழக்குகள் முறையாகத் தணிக்கை செய்யப்பட்டிருக்க வேண்டும். தேவையான சான்றிதழ்கள் பெற்றிருக்க வேண்டும்.

தகுதியும் விருப்பமும் உள்ள தொண்டு நிறுவனங்கள் இதற்கான விண்ணப்பப் படிவங்களை மாவட்ட சமூக நல அலுவலகத்திலிருந்து பெற்றுக்கொள்ளலாம். பூா்த்தி செய்யப்பட்ட விண்ணப்பங்களுடன் நிறுவனப் பதிவுச் சான்று, கடந்த 3 ஆண்டுகளின் தணிக்கை அறிக்கை மற்றும் செயல்பாட்டு அறிக்கைகளை இணைத்து, அக்.8- ஆம் தேதி மாலை 5 மணிக்குள் மாவட்ட சமூக நல அலுவலகம், மாவட்ட ஆட்சியா் வளாகம், விழுப்புரம் என்ற முகவரியில் நேரிடையாகவோ அல்லது பதிவஞ்சல் மூலமாகவோ சமா்ப்பிக்கலாம் என ஆட்சியா் தெரிவித்துள்ளாா்.