அடிக்கடி சர்ச்சைகளுக்கு நடுவே பயணிக்கும் தென்னிந்திய நடிகர் மகேஷ் பாபு சமீபத்தில் அவரது சர்ச்சைக்குரிய பதிலால் நெட்டிசன்களால் மீண்டும்   கிண்டல், கேலிக்கு ஆளாகியுள்ளார்.

நடிகர் மகேஷ் பாபு, மற்றொரு ஹிந்தி நடிகரான டைகர் ஷ்ரஃப் உடன் இணைந்து பான் மசாலா விளம்பரப் படத்தில் நடித்துள்ளது அவரை டிரோல் (troll) செய்பவர்களுக்கு, மற்றொரு முறை டிரோல் செய்ய ஒரு வாய்ப்பை ஏற்படுத்திக் கொடுத்துள்ளது. 

சமீபத்தில் நடிகர் மகேஷ் பாபு நடித்துள்ள மேஜர் (Major) படத்தினை விளம்பரப்படுத்தும் நிகழ்ச்சி நடைபெற்றது. அந்த நிகழ்ச்சியில் மகேஷ் பாபுவிடம், எப்போது ஹிந்தி படங்களில் அறிமுகமாக உள்ளீர்கள் என கேள்வி எழுப்பப்பட்டது.அதற்கு அவர், நான் ஹிந்தி படங்களில் நடித்து எனது நேரத்தை வீணடிக்க விரும்பவில்லை என பதிலளித்தார். அவரது இந்த பதிலுக்கு சினிமாத் துறை பிரபலங்களிடமிருந்து விமர்சனங்கள் எழுந்தன. இருப்பினும், அவரது ரசிகர்கள் அவருக்கு ஆதரவாக நின்றனர். 

இந்நிலையில், மகேஷ் பாபு பான் மசாலா விளம்பரப்படத்தில் நடித்துள்ளது அவரை பலரும் ட்விட்டரில் கேலி, கிண்டலுக்கு ஆளாக்கியுள்ளது. இந்த விளம்பர படத்தில் மகேஷ் பாபு நடித்திருப்பது குறித்து ட்விட்டர் பயனாளர் ஒருவர் பதிவிட்டிருப்பதாவது, “ ஹிந்தி படங்களில் நடித்து தனது நேரத்தை வீணடிக்க விரும்பவில்லை எனக் கூறிய நடிகர் மகேஷ் பாபு பான் மசாலா விளம்பரத்தில் நடித்திருப்பது வேடிக்கையாக உள்ளது” எனப் பதிவிட்டுள்ளார். 

சமீபத்தில் நடிகர் அகஷய் குமார் பான் மசலா விளம்பரத்தில் நடித்து அது பெரிய அளவில் பேசப்பட்டதால் அவர் அந்த விளம்பரப் படத்திலிருந்து விலகியது குறிப்பிடத்தக்கது.