கர்ப்பிணிகளும் கரோனா தடுப்பூசி போட்டுக் கொள்ளலாம்: மத்திய அரசு

புது தில்லி: நாட்டில் இனி கர்ப்பிணிகளும் கரோனா தடுப்பூசி போட்டுக் கொள்ளலாம் என்று மத்திய சுகாதாரத் துறை அறிவித்துள்ளது. 

கர்ப்பிணிகளுக்கும், அவர்களுக்குப் பிறக்கும் குழந்தைகளுக்கும் கரோனா தொற்றுப் பரவ அதிக வாய்ப்புள்ளதால், அவர்களுக்கும் கரோனா தொற்றிலிருந்து தற்காத்துக் கொள்ள தடுப்பூசி போட்டுக் கொள்ளும் உரிமையை உறுதி செய்யும் வகையில், மத்திய அரசு தடுப்பூசி செலுத்திக் கொள்ளும் அறிவுறுத்தலில் சில மாற்றங்களை மேற்கொண்டு வெள்ளிக்கிழமை அறிவிக்கை வெளியிட்டுள்ளது.

கடந்த மாதம் பாலூட்டும் தாய்மார்கள் தடுப்பூசி செலுத்திக் கொள்ள அனுமதி வழங்கப்பட்டிருந்த நிலையில், தற்போது கர்ப்பிணிகளுக்கும் தடுப்பூசி செலுத்திக் கொள்ள அனுமதி வழங்கப்பட்டுள்ளது.

கர்ப்பிணிகளுக்கு கரோனா தொற்றுப் பரவுவதற்கான வாய்ப்புகள் அதிகம் இருப்பதால், அவர்களுக்கு தடுப்பூசி செலுத்திக் கொள்வதிலிருந்து விலக்கு அளிக்கப்படக் கூடாது என்று தேசிய நோய் எதிர்ப்பு சக்தி தொழில்நுட்ப ஆலோசனைக் குழு பரிந்துரை செய்திருந்தது. இதை ஏற்று மத்திய அரசு நேற்று இந்த முடிவை அறிவித்துள்ளது.