சாம்பியன்ஸ் டிராபி தொடருக்கான இந்திய அணி அறிவிப்பு; ரோஹித் சர்மா கேப்டன்!

சாம்பியன்ஸ் டிராபி தொடருக்கான இந்திய அணியை பிசிசிஐ இன்று (ஜனவரி 18) அறிவித்துள்ளது.

சாம்பியன்ஸ் டிராபி கிரிக்கெட் தொடர் அடுத்த மாதம் 19 ஆம் தேதி முதல் தொடங்குகிறது. கிட்டத்தட்ட அனைத்து கிரிக்கெட் வாரியங்களும் சாம்பியன்ஸ் டிராபி தொடருக்கான தங்களது அணிகளை அறிவித்துவிட்டன.

இந்த நிலையில், சாம்பியன்ஸ் டிராபி மற்றும் இங்கிலாந்து அணிக்கு எதிரான ஒருநாள் தொடருக்கான இந்திய அணியை பிசிசிஐ இன்று (ஜனவரி 18) அறிவித்துள்ளது.

இதையும் படிக்க: எப்போது ஓய்வு பெறவேண்டும் என்பதை ரோஹித் சர்மாவே முடிவு செய்வார்: முன்னாள் இந்திய வீரர்

ரோஹித் சர்மா கேப்டன்

15 பேர் கொண்ட இந்திய அணியை ரோஹித் சர்மா கேப்டனாக வழிநடத்துகிறார். துணைக் கேப்டனாக ஷுப்மன் கில் நியமிக்கப்பட்டுள்ளார்.

கடந்த 2023 ஆம் ஆண்டு உலகக் கோப்பைத் தொடரின்போது, காயம் ஏற்பட்டதால் இந்திய அணியில் இடம்பெறாமலிருந்த வேகப் பந்துவீச்சாளர் முகமது ஷமி மீண்டும் அணிக்குத் திரும்பியுள்ளார். சாம்பியன்ஸ் டிராபிக்கான இந்திய அணியில் இடம்பெற்றுள்ள போதிலும், முழு உடல் தகுதி இருக்கும் பட்சத்தில் மட்டுமே ஜஸ்பிரித் பும்ரா விளையாடுவார் எனக் கூறப்பட்டுள்ளது.

இளம் வீரர் யஷஸ்வி ஜெய்ஸ்வால் அணியில் இடம்பெற்றுள்ளார். விக்கெட் கீப்பர்களான ரிஷப் பந்த் மற்றும் கே.எல்.ராகுல் அணியில் இடம்பெற்றுள்ளனர். வேகப் பந்துவீச்சாளர் முகமது சிராஜ் அணியில் சேர்க்கப்படவில்லை.

இதையும் படிக்க: ரஞ்சி கோப்பையில் விராட் கோலி விளையாடுகிறாரா?

இங்கிலாந்து அணிக்கு எதிரான ஒருநாள் தொடருக்கான அணியில் மட்டும் ஹர்சித் ராணா இடம்பெற்றுள்ளார். விஜய் ஹசாரே தொடரில் அபார ஆட்டத்தை வெளிப்படுத்திய கருண் நாயருக்கு அணியில் இடமில்லை.

சாம்பியன்ஸ் டிராபி மற்றும் இங்கிலாந்து அணிக்கு எதிரான ஒருநாள் தொடருக்கான இந்திய அணி விவரம்

ரோஹித் சர்மா (கேப்டன்), ஷுப்மன் கில் (துணைக் கேப்டன்), விராட் கோலி, ஸ்ரேயாஸ் ஐயர், கே.எல்.ராகுல், ஹார்திக் பாண்டியா, அக்‌ஷர் படேல், வாஷிங்டன் சுந்தர், குல்தீப் யாதவ், ஜஸ்பிரித் பும்ரா, முகமது ஷமி, அர்ஷ்தீப் சிங், யஷஸ்வி ஜெய்ஸ்வால், ரிஷப் பந்த், ரவீந்திர ஜடேஜா, ஹர்சித் ராணா (இங்கிலாந்து தொடருக்கு மட்டும்)