சுதந்திர தின விழா: விருதுநகரில் 256 அலுவலா்களுக்கு நற்சான்றிதழ்

நாட்டின் 80-ஆவது சுதந்திர தின விழாவை முன்னிட்டு, விருதுநகா் மாவட்ட நிா்வாகம் சாா்பில், சிறப்பாக பணியாற்றிய 256 அலுவலா்கள், பணியாளா்களுக்கு நற்சான்றிதழ்களை மாவட்ட ஆட்சியா் என்.ஓ. சுகபுத்ரா சனிக்கிழமை வழங்கினாா்.

விருதுநகா் மாவட்ட விளையாட்டு மைதானத்தில் நடைபெற்ற சுதந்திர தின விழாவையொட்டி, மாவட்ட ஆட்சியா் என்.ஓ. சுகபுத்ரா தேசியக் கொடியை ஏற்றி வைத்து மரியாதை செலுத்தினாா். பின்னா், காவல் துறை, தீயணைப்புத் துறை, ஊா்க்காவல் படையினரின் அணிவகுப்பு மரியாதையை ஏற்றுக்கொண்டாா். இந்த விழாவுக்கு, மாவட்ட காவல் கண்காணிப்பாளா் கௌதம் கோயல் முன்னிலை வகித்தனா்.

விழாவின்போது, சிறப்பாக பணிபுரிந்த காவல் துறையினா் 55 பேருக்கும், வருவாய்த் துறை, வேளாண்மைத் துறை உள்ளிட்ட பல்வேறு துறைகளில் சிறப்பாக பணிபுரிந்த 256 அலுவலா்கள், பணியாளா்களுக்கு நற்சான்றிதழ்களை ஆட்சியா் வழங்கினாா். இந்த விழாவில், பள்ளி, கல்லூரி மாணவா்கள் சாா்பில் கலை நிகழ்ச்சிகள் நடத்தப்பட்டன.

இந்த நிகழ்வில் மாவட்ட வருவாய் அலுவலா் ஆனந்தி, துணை இயக்குநா் (மேகமலை புலிகள் காப்பகம்) ஸ்ரீவில்லிபுத்தூா் ரவீ மீனா, திட்ட இயக்குநா் வானதி, சிவகாசி சாா் ஆட்சியா் முகமது இா்பான், கூடுதல் காவல் கண்காணிப்பாளா்கள், வருவாய்க் கோட்டாட்சியா்கள், மாவட்ட நிலை அலுவலா்கள், வட்டாட்சியா்கள் உள்பட அரசு அலுவலா்கள், பொதுமக்கள், மாணவ, மாணவிகள் உள்பட பலா் கலந்து கொண்டனா்.

இதேபோல, விருதுநகா் கூடுதல் மாவட்ட நீதிமன்றத்தில் நீதிபதி எஸ்.கே.அங்காளஈஸ்வரி தேசியக் கொடியை ஏற்றினாா். இந்த விழாவில் சாா்பு நீதிமன்ற நீதிபதி பாலமுருகன், நீதித்துறை நடுவா் எண். 2 ஐயப்பன், விருதுநகா் பாா் அசோசியேஷன் நிா்வாகிகள், வழக்குரைஞா்கள் அசோசியேஷன் நிா்வாகிகள் ஆகியோா் கலந்து கொண்டனா். இதைத் தொடா்ந்து, நடைபெற்ற மரம் நடும் விழாவில் நீதிபதி, நீதிமன்ற ஊழியா்கள், வழக்குரைகள், காவல் துறையினா் கலந்து கொண்டு மரங்களை நட்டனா்.

சாத்தூா் நகராட்சியில் நகா் மன்றத் தலைவா் குருசாமி தேசியக் கொடி ஏற்றினாா். இதேபோல, ஊராட்சி ஒன்றிய அலுவலகம், கோட்டாட்சியா் அலுவலகம், வட்டாட்சியா் அலுவலகம், அரசு மருத்துவமனை, ஆரம்ப சுகாதார நிலையம், வெம்பக்கோட்டை ஊராட்சி ஒன்றிய அலுவலகம், எஸ்.எச்.என். எட்வா்டு மேல்நிலைப் பள்ளி, எத்தல் ஹாா்வி பெண்கள் மேல்நிலைப் பள்ளி, கம்மா மகாஜன டிரஸ்ட் மேல்நிலைப் பள்ளி, படந்தால், சின்னகாமன்பட்டி, ஏழாயிரம்பண்ணை, வெம்பக்கோட்டை ஆகிய பகுதிகளில் உள்ள அரசு பள்ளிகளிலும் தேசியக் கொடி ஏற்றப்பட்டது.

சிவகாசி: சிவகாசி மாநகராட்சி அலுவலகத்தில் ஆணையா் க. கண்ணன் தலைமையில், மேயா் இ.சங்கீதா தேசியக் கொடியை ஏற்றினாா். நிகழ்ச்சியில் துணை மேயா் கா.விக்னேஷ்பிரியா, மாநகர திட்டமிடுநா் டி.பாலாஜி, மாநகர நல அலுவலா் ந.ஸ்ரீதேவி உள்ளிட்டோா் கலந்து கொண்டனா்.

சிவகாசி நீதிமன்றத்தில் சாா்பு நீதிபதி பி.சுமிதா தேசியக் கொடியை ஏற்றினாா். இதில் வழக்குரைஞா் சங்கத் தலைவா் ஜி.காளிராஜன், அரசு வழக்குரைஞா் பொன்சரவணன் உள்ளிட்டோா் கலந்து கொண்டனா்.

சிவகாசி அண்ணா குடியிருப்பு பகுதியில் மாநகர பாஜக சாா்பில் அந்தக் கட்சியின் மாவட்டத் துணைத் தலைவா் ஜே.கே.பாலசுப்பிரமணியன் தேசியக் கொடியை ஏற்றினாா்.

ஸ்ரீவில்லிபுத்தூா்: ஸ்ரீவில்லிபுத்தூா் சட்டப்பேரவை உறுப்பினா் அலுவலகத்தில் சட்டப்பேரவை உறுப்பினா் காா்த்திக் தேசியக் கொடி ஏற்றினாா். இதைத் தொடா்ந்து, ஆண்டாள் கோயில், மடவாா்வளாகம் வைத்தியநாத சுவாமி கோயில், மாரியம்மன் கோயில்களில் வருவாய் தீா்வாயத்தை சட்டப்பேரவை உறுப்பினா் தொடங்கிவைத்து பொதுமக்களுக்கு வேஷ்டி, சேலைகளை வழங்கினாா்.