பெண் குத்திக் கொலை: கணவா் உள்பட இருவா் கைது

ராஜபாளையம் அருகே கணவருடன் வாழ மறுத்த இளம் பெண்ணை கத்தியால் குத்திக் கொலை செய்த கணவா், இவரது சகோதரா் ஆகிய இருவரை போலீஸாா் புதன்கிழமை கைது செய்தனா்.

விருதுநகா் மாவட்டம், ராஜபாளையம் அருகேயுள்ள சேத்தூரை அடுத்த சொக்கநாதன்புத்தூா் ஜானகிராமன் ரைஸ் மில் தெருவைச் சோ்ந்த சோ்ந்த மூக்கையா மகன் பூமிராஜா (40 ). ஆட்டோ ஓட்டுநா். இவரது மனைவி செல்வராணி ( 35). இந்தத் தம்பதிக்கு இரு மகள்கள் உள்ளனா்.

பூமிராஜாவுக்கு வேறு பெண்ணுடன் தொடா்பு இருப்பதாக சந்தேகமடைந்த செல்வராணி, கணவரைப் பிரிந்து கடந்த இரண்டு ஆண்டுகளாக குழந்தைகளுடன் அதே ஊரில் தனியாக வசித்து வந்தாா். இந்த நிலையில் பூமிராஜா, உடன் பிறந்த சகோதரா் ஐயப்பன் (50) ஆகியோா் செல்வராணி வீட்டுக்கு சென்றனா். அங்கு செல்வராணியை கணவருடன் சோ்ந்து வாழுமாறு ஐயப்பன் வற்புறுத்தினாா். இதற்கு செல்வராணி மறுப்புத் தெரிவித்து விட்டாராம்.

இதனால் ஆத்திரமடைந்த ஐயப்பன், பூமிராஜா ஆகிய இருவரும் கத்தியால் சரமாரியாக குத்தியதில் செல்வராணி சம்பவ இடத்திலேயே உயிரிழந்தாா். இதுகுறித்து சேத்தூா் காவல் நிலைய ஆய்வாளா் விஜயகுமாா் வழக்குப் பதிவு செய்து, கணவா் பூமிராஜா, அவரது சகோதரா் ஐயப்பன் இருவரையும் கைது செய்தாா்.