செரப்பணஞ்சேரி ஏரியில் கழிவுநீா் கலப்பு: பொதுமக்கள் கோரிக்கை

காரணிந்தாங்கல் பகுதியில் உள்ள தனியாா் அடிக்குமாடி குடியிருப்பில் இருந்து வெளியேறும் கழிவுநீா் செரப்பணஞ்சேரி பெரிய ஏரியில் கலப்பதைத் தடுக்க மாவட்ட நிா்வாகம் நடவடிக்கை எடுக்க வேண்டும் என அப்பகுதி பொதுமக்களும், விவசாயிகளும் கோரியுள்ளனா்.

குன்றத்தூா் ஒன்றியத்துக்குட்பட்ட செரப்பணஞ்சேரி பகுதியில், பொதுப்பணித்துறை கட்டுப்பாட்டில் உள்ள சுமாா் 100 ஏக்கா் பெரிய ஏரி உள்ளது. இந்த ஏரி நீா் செரப்பணஞ்சேரி உள்ளிட்ட சுற்றுவட்டார பகுதிகளின் முக்கிய குடிநீா் ஆதாரமாக விளங்கி வருகிறது. மேலும், இந்த ஏரி நீரை பயன்படுத்தி செரப்பணஞ்சேரி ஊராட்சிக்குட்பட்ட நாவலூா் உள்ளிட்ட பகுதிகளில் தற்போது சுமாா் 100 ஏக்கா் பரப்பளவில் விவசாயம் நடைபெற்று வருகிறது.

இந்த நிலையில், செரப்பணஞ்சேரி ஊராட்சிக்கு அருகில் உள்ள வைப்பூா் ஊராட்சிக்குட்பட்ட காரணித்தாங்கல் பகுதியில் உள்ள தனியாா் அடுக்குமாடி குடியிருப்பில் இருந்து வெளியேறும் கழிவுநீா் வண்டலூா்-வாலாஜாபாத் சாலையோரம் உள்ள மழைநீா் வடிகால்வாய் மூலமாக சென்று அருகில் உள்ள செரப்பணஞ்சேரி பெரிய ஏரியில் கடந்த சில ஆண்டுகளாக கலந்து வருகிறது. இதனால் ஏரிநீா் மாசடைந்து துா்நாற்றம் வீசி வருவதோடு விவசாயத்திற்கு பயன்படுத்த முடியாத நிலையும் ஏற்பட்டுள்ளது.

எனவே செரப்பணஞ்சேரி ஏரியில் கழிவுநீா் கலப்பதை தடுக்கவும், ஏரியில் கழிவுநீா் கலந்து வரும் தனியாா் குடியிருப்பு மீதுமாவட்ட நிா்வாகம் நடவடிக்கை எடுக்க வேண்டும் எனவும் அப்பகுதி பொதுமக்கள், விவசாயிகள் கோரிக்கை வைத்துள்ளனா்.