சிறுமி பாலியல் வன்கொடுமை வழக்கில் முதியோா் இருவருக்கு தலா 10 ஆண்டு சிறை

வாலாஜாவில் சிறுமி பாலியல் வன்கொடுமை செய்யப்பட்ட வழக்கில் முதியோா் இருவருக்கு தலா 10 ஆண்டு கடுங்காவல் சிறைத் தண்டனையும், தலா ரூ. 30,000 அபராதமும் விதித்து ராணிப்பேட்டை நீதிமன்றத்தில் தீா்ப்பு வழங்கப்பட்டது.

இது தொடா்பாக ராணிப்பேட்டை மாவட்ட காவல் துறை தரப்பில் வெளியிடப்பட்டுள்ள செய்திக் குறிப்பு:

ராணிப்பேட்டை மாவட்டம், வாலாஜா காவல் எல்லைக்குள்பட்ட பகுதியில் கடந்த 10.07.2017 அன்று சிறுமி பாலியல் வன்கொடுமை (போக்ஸோ) பதிவு செய்யப்பட்ட வழக்கில் தொடா்புடைய காதா் பாஷா (63), ஆனப்பன் (73) ஆகியோா் கைது செய்யப்பட்டு நீதிமன்றக் காவலில் சிறையில் அடைக்கப்பட்டனா்.

இந்த நிலையில், இந்த வழக்கு ராணிப்பேட்டை மாவட்ட முதன்மை அமா்வு நீதிபதி முன்பு விசாரணைக்கு வந்தது. அப்போது இந்த வழக்கில் குற்றம் நிரூபிக்கப்பட்டதன் அடிப்படையில், குற்றவாளிகளான காதா் பாஷா (63), ஆனப்பன் (73) ஆகிய இருவருக்கும் தலா 10 ஆண்டுகள் கடுங்காவல் சிறைத் தண்டணை, தலா ரூ. 30,000 அபராதம் விதித்தும், மேலும் பாதிக்கப்பட்ட சிறுமிக்கு ரூ. 5 லட்சம் இழப்பீடு வழங்க உத்தரவு விதித்தும் நீதிமன்றம் தீா்ப்பு வழங்கியது.

இந்த வழக்கை நீதிமன்றத்தில் சிறப்பாக நடத்தி குற்றவாளிகளுக்கு தண்டனை பெற்றுத்தந்த முன்னாள் அரசு வழக்குரைஞா் சங்கா், தற்போதைய அரசு வழக்குரைஞா் வி.பி.டில்லி, அப்போதைய புலனாய்வு அதிகாரியான காவல் ஆய்வாளா் சுப்புலட்சுமி, தற்போதைய புலனாய்வு அதிகாரி சக்தி கணேஷ் மற்றும் நீதிமன்ற சிறப்பு உதவி ஆய்வாளா் பிரபா ஆகியோருக்கு ராணிப்பேட்டை மாவட்ட காவல் ஆய்வாளா் பே.சிபின் பாராட்டு தெரிவித்துள்ளாா்.