வங்கியில் கடன் பெற்றுத் தருவதாக 6 பவுன் மோசடி: பெண் மீது வழக்கு

கூட்டுறவு வங்கியில் கடன் பெற்றுத் தருவதாகக்கூறி 6 பவுன் நகைகளை வாங்கி மோசடி செய்ததாக பெண் மீது போலீஸாா் வழக்குப் பதிவு செய்து விசாரணை நடத்தி வருகின்றனா்.

கோவை, இருகூா் ஏ.ஜி.புதூா் பகுதியைச் சோ்ந்தவா் மயில்சாமி மனைவி விஜயா (33). இவருக்கு பணத் தேவை ஏற்பட்டதால், அதே பகுதியைச் சோ்ந்த கோகிலாமணி என்பவரை அணுகியுள்ளாா்.

அப்போது, அவா் நகையைக் கொடுத்தால் கூட்டுறவு வங்கியில் அடகு வைத்து பணம் பெற்றுத் தருகிறேன் எனக் கூறியதாகத் தெரிகிறது.

இதை நம்பிய விஜயா 6 பவுன் நகைகளை கடந்த 10.11.2025- இல் கோகிலாமணியிடம் கொடுத்துள்ளாா். நகையைப் பெற்றுக் கொண்ட அவா், பணத்தை வாங்கித் தராமல் இருந்துள்ளாா். மேலும், கொடுத்த நகைகளை விஜயா கேட்டபோது பல்வேறு காரணங்களைக்கூறி காலம் தாழ்த்தி வந்துள்ளாா்.

தான் ஏமாற்றப்பட்டதை உணா்ந்த விஜயா இது குறித்து சிங்காநல்லூா் காவல் நிலையத்தில் புகாா் அளித்தாா்.

இதன்பேரில், கோகிலாமணி மீது காவல் ஆய்வாளா் அா்ஜுன்குமாா் வழக்குப் பதிவு செய்து விசாரணை நடத்தி வருகிறாா்.