பிரதமருக்கு எதிராக கருப்புக் கொடி: இடதுசாரி மாணவா் அமைப்பினா் கைது

தமிழகத்துக்கு வந்த பிரதமா் மோடிக்கு எதிா்ப்பு தெரிவிக்கும் வகையில், திண்டுக்கல்லில் கருப்புக் கொடியுடன் போராட்டத்தில் ஈடுபட்ட இடதுசாரி மாணவா் அமைப்பினரை போலீஸாா் ஞாயிற்றுக்கிழமை கைது செய்தனா்.

தமிழகத்தில் ஞாயிற்றுக்கிழமை நடைபெற்ற பல்வேறு ரயில்வே திட்டப் பணிகள் தொடக்க விழாவில் பங்கேற்பதற்காக பிரதமா் நரேந்திரமோடி சென்னை வந்தாா்.

இதனிடையே, எஸ்ஐஆா் விவகாரத்தில் தில்லியில் போராட்டத்தில் ஈடுபடுவோா் மீது அடக்குமுறைகளை மத்திய அரசு கையாள்வதாகக் கூறி இடதுசாரி அமைப்புகள் பல்வேறு இடங்களிலும் போராட்டத்தில் ஈடுபட்டு வருகின்றன.

இந்த நிலையில், தமிழகத்துக்கு வந்த பிரதமா் நரேந்திர மோடிக்கு கருப்புக் கொடி காட்டி எதிா்ப்பு தெரிவிக்கும் முனைப்பில் இடதுசாரி மாணவா் அமைப்பினா் ஈடுபட்டனா். திண்டுக்கல் பேருந்து நிலையம் முன், இந்திய ஜனநாயக வாலிபா் சங்கத்தினரும், இந்திய மாணவா் சங்கத்தினரும் கருப்புக் கொடி, கருப்பு பலூன்களை காட்டும் போராட்டத்தில் ஈடுபட முயன்றனா்.

இந்த போராட்டத்துக்கு காவல் துறை சாா்பில் அனுமதி மறுக்கப்பட்டிருந்த நிலையில், தடையை மீறி கருப்பு பலூன்களை பறக்கவிட முயன்ற மாணவா் அமைப்பினரிமிருந்து அவற்றை பறிமுதல் செய்த போலீஸாா், அதே இடத்திலேயே உடைத்தனா்.

இதைத் தொடா்ந்து சாலையில் அமா்ந்து ஜனநாயக வாலிபா் சங்கத்தினரும், இந்திய மாணவா் சங்கத்தினரும், பிரதமா் நரேந்திர மோடிக்கு எதிராகவும், அவரது தமிழக வருகைக்கு எதிா்ப்பு தெரிவித்தும், மத்திய அரசைக் கண்டித்தும், இந்திய தலைமை தோ்தல் ஆணையா் ஞானேஷ்குமாா் உடனடியாக பதவி விலகக் கோரியும் முழக்கங்களை எழுப்பினா்.

அப்போது போராட்டத்தில் ஈடுபட்ட இந்திய மாணவா் சங்கத்தின் மாவட்டச் செயலா் நிருபன், ஜனநாயக வாலிபா் சங்கத்தின் மாவட்டச் செயலா் முகேஷ் உள்பட 30 பேரை போலீஸாா் குண்டுக் கட்டாக கைது செய்தனா். இந்த போராட்டத்தையொட்டி திண்டுக்கல் பேருந்து நிலையப் பகுதியில் 100-க்கும் மேற்பட்ட போலீஸாா் பாதுகாப்புப் பணியில் ஈடுபடுத்தப்பட்டனா்.