சாத்தூர் அருகே அனுமதியின்றி  மணல் அள்ளியதாக  காவல் உதவி ஆய்வாளர் உள்பட 4 பேர் மீது வழக்கு

சாத்தூர் அருகே அனுமதியின்றி மணல் அள்ளியதாக காவல் உதவி ஆய்வாளர் உள்பட  4 பேர் மீது வெம்பகோட்டை போலீஸார் வழக்குப் பதிவு செய்துள்ளனர்.
    விருதுநகர் மாவட்டம் சாத்தூர் அருகே வைப்பாற்று பகுதியில் அனுமதியின்றி மணல் அள்ளப்படுவதாக போலீஸாருக்கு தகவல் கிடைத்தது. இத் தகவலின் பேரில் வெம்பகோட்டை காவல் உதவி ஆய்வாளர் ஞானசேகரன் தலைமையில் போலீஸார் வியாழக்கிழமை வைப்பாற்று பகுதியில் சோதனை நடத்தினர். இச் சோதனையில் வெம்பக்கோட்டை பகுதியைச் சேர்ந்த பொன்.இருளப்பன் மற்றும் அன்னபூரணியாபுரம் பகுதியை சேர்ந்த பாலமுருகன் உள்ளிட்ட 3 பேர் பொக்லைன் இயந்திரம் மூலம் சட்டவிரோதமாக லாரிகளில் மணல் அள்ளியது தெரியவந்தது.
இதையடுத்து பொன்.இருளப்பன், பாலமுருகன் உள்ளிட்ட 3 பேர் மீது வழக்குப் பதிவு செய்து,பொன். இருளப்பனை வெம்பக்கோட்டை போலீஸார் கைது செய்தனர். பின்னர் பொன். இருளப்பனிடம் போலீஸார் நடத்திய விசாரணையில், வெம்பக்கோட்டை காவல் நிலையத்தில் பணிபுரியும் காவல் உதவி ஆய்வாளர் சந்திரசேகரன் இதற்கு உடந்தையாக இருந்ததாக தெரியவந்தது. 
  இதையடுத்து காவல் உதவி ஆய்வாளர் சந்திரசேகரன் மீதும் வழக்குப் பதிவு செய்து, மணல் அள்ள பயன்படுத்திய பொக்லைன் இயந்திரம் மற்றும் 2 லாரிகளை போலீஸார் பறிமுதல் செய்தனர்.