ஆடுதுறை - சுந்தரப்பெருமாள் கோயில் இடையே இரட்டை ரயில் வழிப்பாதை அமைக்க ஆய்வு

தஞ்சாவூா் மாவட்டம், ஆடுதுறை -சுந்தரப் பெருமாள்கோயில் இடையே இரட்டை ரயில் வழிப்பாதை அமைக்க கும்பகோணம் ரயில் நிலையத்தில் தெற்கு ரயில்வே முதன்மை நிா்வாக அதிகாரி சுஷில்குமாா் மெளரியா வியாழக்கிழமை ஆய்வு நடத்தினாா்.

தஞ்சாவூா் முதல் விழுப்புரம் வரையிலான ஒற்றை ரயில் பாதையை இரட்டை ரயில் பாதையாக மாற்ற ரயில் பயணிகள் நீண்டநாள்களாகக் கோரிக்கை விடுத்தனா்.

இந்நிலையில் கும்பகோணம் அருகே ஆடுதுறையில் இருந்து சுந்தரப்பெருமாள்கோயில் வரையிலான 21.50 கிமீ. தூரத்துக்கு முதல்கட்டமாக இரட்டை ரயில் பாதை அமைக்க ரயில்வே நிா்வாகம் ஒப்புதல் அளித்து ரூ. 289.17 கோடியில், பணிகள் நடைபெற உள்ளன.

இப் பணிகளை தொடங்குவது குறித்து தெற்கு ரயில்வே முதன்மை நிா்வாக அதிகாரி (கட்டுமானம்) சுஷில்குமாா் மெளரியா, ஆடுதுறை, சுந்தரபெருமாள்கோயில் இடையே உள்ள ரயில் நிலையங்களில் நடைமேடை விரிவாக்கம், தண்டவாளங்கள் எண்ணிக்கை குறித்து ஆய்வு செய்தாா். ஆய்வின்போது முதன்மைப் பொறியாளா் ஹரிபாபு, உதவி முதன்மைப் பொறியாளா் ரவிக்குமாா் மற்றும் ரயில்வே நிா்வாக அனைத்துப் பிரிவு அதிகாரிகளும் இருந்தனா்.