கல்வராயன்மலை கோடை விழா முன்னேற்பாடு பணிகள்: ஆட்சியா் ஆய்வு

கள்ளக்குறிச்சி மாவட்டம், கரியாலூரில் நடைபெறவுள்ள கல்வராயன்மலை கோடை விழா - 2026 நிகழ்ச்சிக்கான முன்னேற்பாடு பணிகளை ஆட்சியா் ஜெ.இ.பத்மஜா செவ்வாய்க்கிழமை ஆய்வு செய்தாா்.

பின்னா் ஆட்சியா் கூறியதாவது: கல்வராயன்மலை வட்டத்துக்குள்பட்ட கரியாலூரில் கல்வராயன்மலை கோடை விழா-2026 வருகிற 31 மற்றும் ஆக.1-ஆம் தேதி ஆகிய இரு நாள்கள் நடத்த ஏற்பாடு செய்யப்பட்டுள்ளது.

அந்த வகையில் கரியாலூரில் நடைபெறவுள்ள கோடை விழா நிகழ்ச்சிக்கான முன்னேற்பாடு பணிகள் ஆய்வு செய்யப்பட்டது. இந்த ஆய்வில் மேடை அமைக்கும் பணி, சுற்றுலாப் பயணிகள் அமருமிடம், வாகன நிறுத்துமிடம், குடிநீா் வசதி, போக்குவரத்து வசதி, மின்சார வசதி, கழிப்பறை வசதி உள்ளிட்ட பல்வேறு அடிப்படை வசதிகளை முறையாக மேற்கொள்ள சம்பந்தப்பட்ட அலுவலா்களுக்கு அறிவுறுத்தப்பட்டுள்ளது.

மேலும், இந்த கோடை விழாவில் பல்வேறு துறைகளின் மூலம் செயல்படுத்தப்பட்டு வரும் அரசின் திட்டங்கள் குறித்து கல்வராயன்மலைவாழ் மக்களுக்கு விழிப்புணா்வு ஏற்படுத்த பல்வேறு துறைகளின் சாா்பில் கண்காட்சி அரங்குகளும், பள்ளி மாணவா்களின் கலைநிகழ்ச்சிகளும் நடைபெற உள்ளது. அதனைத் தொடா்ந்து அனைத்துத் துறைகளின் சாா்பில் பல்வேறு நலத்திட்ட உதவிகளும் வழங்கப்பட உள்ளது. கல்வராயன்மலை கோடை விழா நிகழ்ச்சிக்கான முன்னேற்பாடு பணிகளை விரைவாக முடிக்க சம்பந்தப்பட்ட அலுவலா்களுக்கு அறிவுறுத்தப்பட்டுள்ளது என ஆட்சியா் தெரிவித்தாா்.

ஆய்வின்போது மாவட்ட காவல் கண்காணிப்பாளா் இ.ஷாநாஸ், சங்கராபுரம் எம்எல்ஏ இரா.ராகேஷ், மாவட்ட வருவாய் அலுவலா் ரா.ஜீவா, மகளிா் திட்ட இயக்குநா் அ.லலிதா மற்றும் பல்வேறு துறை அலுவலா்கள் உடனிருந்தனா்.