முத்தங்கா வழக்கில் காவல் துன்புறுத்தலுக்கு உள்ளான ஆசிரியா்: 23 ஆண்டுகளுக்குப் பிறகு ரூ. 12.5 லட்சம் இழப்பீடு வழங்கும் கேரள அரசு

கேரள மாநிலம் வயநாட்டில் கடந்த 2003-ஆம் ஆண்டு நிகழ்ந்த முத்தங்கா பழங்குடியினா் நில உரிமைப் போராட்டத்தில் கைது செய்யப்பட்டு காவல்நிலைய துன்புறுத்தலுக்கு உள்ளான ஆசிரியருக்கு, ரூ. 12.5 லட்சம் இழப்பீடு வழங்க 23 ஆண்டுகளுக்குப் பிறகு மாநில அரசு ஒப்புதல் அளித்துள்ளதாக அதிகாரிகள் சனிக்கிழமை தெரிவித்தனா்.

இதுதொடா்பாக மாநில உள்துறை பிறப்பித்த உத்தரவில், ‘காவல் துன்புறுத்தலில் பாதிக்கப்பட்ட சுல்தான் பத்தேரியில் உள்ள மாவட்ட கல்வி மற்றும் பயிற்சி (டிஐஇடி) நிறுவனத்தில் மூத்த விரிவுரையாளராகப் பணியாற்றிய கே.கே. சுரேந்திரனுக்கு, ரூ. 12.5 லட்சம் இழப்பீடு தொகையை விடுவிக்க மாநில காவல் துறை தலைமை இயக்குநருக்கு உத்தரவிடப்படுகிறது. இந்தத் தொகையை, சம்பவம் நடந்தபோது அவரை சட்ட விரோதமாக கைது செய்து, காவலில் வைத்து சித்ரவதை செய்த இரு காவல் துறை அதிகாரிகளின் தனிப்பட்ட சொத்துகளில் இருந்து வசூலித்து வழங்குமாறு அறிவிறுத்தப்படுகிறது’ என்று தெரிவிக்கப்பட்டது.

கேரள மாநிலத்தில் கடந்த 2003-ஆம் ஆண்டு காங்கிரஸ் தலைமையிலான ஐக்கிய ஜனநாயக முன்னணி ஆட்சியின்போது, மாநிலத்தில் நிலமற்ற பழங்குடியின குடும்பங்களுக்கு நிலம் வழங்கப்படும் என்று காங்கிரஸ் அளித்த தோ்தல் வாக்குறுதியை நிறைவேற்றக் கோரி, ஆதிவாசி கோத்ர மஹா சபை என்ற அமைப்பின் தலைமையில் முத்தங்கா என்ற பகுதியில் நில உரிமைப் போராட்டம் நடத்தப்பட்டது. இந்தப் போராட்டத்தின் ஒரு பகுதியாக பழங்குடியின குடும்பங்கள், முத்தங்கா வன உயிரின சரணாலயப் பகுதிக்குள் அத்துமீறி நுழைந்து வன நிலங்களை ஆக்கிரமித்து கூடாரங்களை அமைத்து போராட்டத்தில் ஈடுபட்டனா். இவா்களின் போராட்டம் தொடா்ந்த நிலையில், அந்தப் பகுதியில் ஏராளமான போலீஸாா் குவிக்கப்பட்டு, வனப் பாதுகாப்பு அலுவலா்களுடன் இணைந்து போராட்டக்காரா்களை வனப் பகுதியிலிருந்து வலுக்கட்டாயமாக அப்புறப்படுத்தினா். போராட்டத்தில் ஈடுபட்ட பலரை போலீஸாா் கைது செய்தனா்.

இந்தப் போராட்டத்துக்கு மூல காரணமாக இருந்ததாக கூறப்பட்ட விரிவுரையாளா் கே.கே. சுரேந்திரனை, 2003-ஆம் ஆண்டு பிப்ரவரி 22-ஆம் தேதி கைது செய்த போலீஸாா், சுல்தான் பத்தேரி காவல் நிலையத்தில் வைத்து அடித்து சித்திரவதை செய்துள்ளனா். மேலும் அவா் மீது மூன்று குற்ற வழக்குகளையும் பதிவு செய்தனா்.

இந்த நிலையில், தன்னை சட்ட விரோதமாக கைது செய்து, காவல் நிலையத்தில் சித்திரவதை செய்ததற்காக ரூ. 15 லட்சம் இழப்பீடு கோரி சுரேந்திரன் வழக்கு தொடா்ந்தாா். இந்த வழக்கை விசாரித்த சுல்தான் பத்தேரியில் உள்ள மாவட்ட நீதிமன்றம், காவல் ஆய்வாளா் வி.தேவராஜ், உதவி ஆய்வாளா் பி. விஸ்வம்பரன் ஆகியோா் சுரேந்திரனை சட்டவிரோதமாக கைது செய்து, காவலில் வைத்து சித்திரவதை செய்தது உறுதியாகிறது. எனவே அவருக்கு ரூ. 5 லட்சம் இழப்பீடு வழங்க வேண்டும். இதை, சம்பவம் நடந்த நாளிலிருந்து வட்டியுடன் கணக்கிட்டு வழங்க வேண்டும் என்று உத்தரவிட்டாா்.

இதை எதிா்த்து இரு காவல் அலுவலா்களும் வழக்கு தொடா்ந்தனா். இந்த வழக்கை விசாரித்த கல்பெற்றா கூடுதல் மாவட்ட நீதிமன்ற நீதிபதி, பாதிக்கப்பட்ட சுரேந்திரனுக்கு இழப்பீடு தொகையை ரூ. 12.5 லட்சமாக உயா்த்தி வழங்க உத்தரவிட்டதோடு, சம்பவம் நடந்த நாளிலிருந்து ஆண்டுக்கு 6 சதவீத வட்டியைக் கணக்கிட்டு அதையும் சோ்த்து வழங்க உத்தரவிட்டாா். இந்த இழப்பீட்டுத் தொகையை இரு காவல் அதிகாரிகளின் தனிப்பட்ட சொத்துகளில் இருந்து வசூலித்து வழங்க வேண்டும் என்றும் உத்தரவிட்டாா்.

இந்த உத்தரவுக்குப் பிறகு பல ஆண்டுகள் ஆகியும், சுரேந்திரனுக்கு இழப்பீடு தொகை வழங்கப்படவில்லை. இது தொடா்பாக மாநில அரசு அதிகாரிகளை அவா் தொடா்ந்து சந்தித்து கோரிக்கையும் விடுத்து வந்துள்ளாா்.

இது குறித்து, ஊடகத்துக்கு சுரேந்திரன் அண்மையில் அளித்த பேட்டியில், ‘இழப்பீடுக்காக 23 ஆண்டுகளாகப் போராடி வருகிறேன். இழப்பீடை விடுவிக்கக் கோரி மாநில முதல்வா் வி.டி.சதீசனை கடந்த மாதம் சந்தித்து கோரிக்கை விடுத்தேன்’ என்றாா்.

இந்தச் செய்தி வெளியான நிலையில், தனது எக்ஸ் பக்கத்தில் இதுகுறித்து அண்மையில் பதிவிட்ட முதல்வா் வி.டி.சதீசன், ‘சுரேந்திரன் விவகாரத்தில் மேல்முறையீடு செய்ய வேண்டாம் என மாநில அரசு முடிவு செய்துள்ளது. அவருக்கு இழப்பீடு தொகையை விரைந்து வழங்குமாறு மாநில காவல் துறைக்கு உத்தரவிட்டப்பட்டுள்ளது’ என்று குறிப்பிட்டாா்.

இந்த நிலையில், ‘நீதிமன்ற உத்தரவுப்படி, சுரேந்திரனுக்கு ரூ. 12.5 லட்சம் இழப்பீடு வழங்க மாநில உள்துறை உத்தரவிட்டுள்ளது’ என்று மாநில அரசு அதிகாரிகள் சனிக்கிழமை தெரிவித்தனா்.