மொத்த விலை பணவீக்கம் 9.78%-லிருந்து 9.92%-ஆக உயர்வு

இந்தியாவின் மொத்த விலை பணவீக்கம், ஜூலை மாதத்தில் 9.78 சதவிகிதமாக இருந்த நிலையில், ஆகஸ்ட் மாதத்தில் 9.92 சதவிகிதமாக உயர்ந்துள்ளது.

உணவு, எரிபொருள், உற்பத்திப் பொருள்களின் விலை உயர்வு காரணமாக மொத்த விலைக் குறியீடு (Wholesale Price Index) உயர்ந்துள்ளது. இதனால், கடந்த ஜூலை மாதத்தில் 9.78 சதவிகிதமாக இருந்த மொத்த விலை பணவீக்கம், ஆகஸ்ட் மாதத்தில் 9.92 சதவிகிதமாக உயர்ந்தது.

மொத்த விலை பணவீக்க உயர்வுக்கு முக்கிய காரணம் எரிபொருள், மின்சாரச் செலவுகளே. இவை ஜூலை மாதத்தில் 20.05 சதவிகிதத்திலிருந்து 22.93 சதவிகிதமாக உயர்ந்துள்ளன.

உற்பத்திப் பொருள்களின் பணவீக்கம் ஜூலையில் 8.29 சதவிகிதத்திலிருந்து 8.37 சதவிகிதமாகவும், உணவுப் பொருள்கள் பணவீக்கம் 6.65 சதவிகிதத்திலிருந்து 7.05 சதவிகிதமாகவும் உயர்ந்துள்ளன.

சீரற்ற பருவமழை உள்ளிட்ட காரணங்களால் உணவு விநியோகம் பாதிக்கப்பட்டு, சர்க்கரை, தானியங்கள், சமையல் எண்ணெய், பால், முட்டை, இறைச்சி போன்ற அத்தியாவசியப் பொருள்களின் விலைகள் உயர்ந்துள்ளன. அதுமட்டுமின்றி, கச்சா எண்ணெய் விலை உயர்ந்ததால், சமையல் எரிவாயுவின் விலையும் உயர்ந்து பணவீக்க அழுத்தங்களுக்குக் காரணமாக அமைந்துள்ளன.