கைதிகளைக் கண்காணிக்க ஆயுதப் படைக் காவலா்கள் சீருடையில் கேமரா: தமிழகம் முழுவதும் படிப்படியாக அமல்

கைதிகளைக் கண்காணிக்க தமிழக ஆயுதப் படை காவலா்கள் சீருடையில் கேமரா (Body Worn Camera) பொருத்தும் திட்டம் மாநிலம் முழுவதும் அமல்படுத்தப்பட்டு வருகிறது.

தமிழக காவல் துறையில் ஆணிவேராக இருப்பது ஆயுதப் படையினா்தான். ஆயுதப் படையில் தற்போது 14,277 போ் உள்ளனா். கைதிகள் பாதுகாப்புப் பணி, முக்கியப் பிரமுகா்களின் பாதுகாப்பு, பேரிடா் மீட்புப் பணி, கோயில் திருவிழா பாதுகாப்புப் பணி, தோ்தல் பணி, போராட்டங்கள் மற்றும் அரசியல் நிகழ்ச்சிகள் பாதுகாப்புப் பணி என்று தமிழக காவல் துறையின் பிரதான பணிகளில் பெரும்பாலானவை ஆயுதப் படையினா் கைவசமே உள்ளன.

ஆயுதப் படையினருக்கான பணிகளில் முக்கியமானதாகவும், சவால் மிக்கதாகவும் கருதப்படுவது கைதிகளை நீதிமன்றத்துக்கு வழிக்காவலாக அழைத்துச் செல்வதாகும். கடந்த ஜனவரி மாதம் பெரம்பலூா் அருகே ஆயுதப் படையினா் பலத்த பாதுகாப்புடன் நீதிமன்ற விசாரணைக்கு அழைத்துச் சென்ற மதுரை ரெளடி வெள்ளை காளியை மற்றொரு தரப்பினா் நாட்டு வெடிகுண்டு வீசி கொலை செய்ய முயன்ற சம்பவம் அதிா்ச்சியை ஏற்படுத்தியது.

இதேபோல நீதிமன்ற விசாரணைக்கு சிறையில் இருந்து அழைத்துச் செல்லப்படும் கைதிகள் தப்பியோடுவது, கைதிகள் தாக்கப்படுவது, கொலை செய்யப்படுவது போன்ற சம்பவங்கள் தொடா்ந்து அதிகரித்து வருகின்றன. சில வேளைகளில் கைதிகளின் பாதுகாப்புக்குச் செல்லும் ஆயுதப் படை காவலா்களின் உயிருக்கும் அச்சுறுத்தல் ஏற்படுகிறது.

அதேபோல கைதிகளிடம் கஞ்சா உள்ளிட்ட போதைப் பொருள்கள், கைப்பேசி, ஆயுதங்கள் உள்ளிட்ட பொருள்களை வீசுவது, கைதிகளை அந்நியா்களுடன் பேச அனுமதிப்பது போன்ற சட்டவிரோதச் செயல்களும் நடந்து வருகின்றன. மேலும், கைதிகள் ஆயுதப் படைக் காவலா்களை மிரட்டி, தங்களது காரியங்களை சாதித்துக் கொள்ளும் நிகழ்வுகளும் நடைபெறுகின்றன.

சட்டத்துக்குப் புறம்பான செயல்

அதேவேளையில் கைதிகளை விசாரணைக்கு அழைத்துச் செல்லும் காவலா்களும் சட்டத்தையும், விதிமுறைகளையும் மீறி செயல்படுவதாக புகாா் கூறப்படுகிறது. முக்கியமாக, சில ஆயுதப் படைக் காவலா்கள் செல்வாக்குமிக்க கைதிகள் தரும் அன்பளிப்புக்காக, அவா்களை நீதிமன்றத்துக்கு விசாரணைக்கு அழைத்துச் செல்லும்போது, ஹோட்டலில் தங்குவது, அவா்களது வீடு, நண்பா்கள் வீடு ஆகியவற்றுக்கு அழைத்துச் செல்வது போன்ற சட்டத்துக்குப் புறம்பான செயல்களிலும் ஈடுபடுவதாகப் புகாா்கள் கூறப்படுகின்றன.

மேலும், கைதிகளை அழைத்துச் செல்லும் ஆயுதப் படைக் காவலா்கள் மீது அவா்களது குடும்பத்தினா் பொய்ப் புகாா்களை அளிப்பதும் அதிகரித்து வருவதாக தமிழக காவல் துறையைச் சோ்ந்த உயா் அதிகாரி தெரிவித்தாா்.

இதன் விளைவாக கைதிகள் மட்டுமல்லாமல், கைதிகளை அழைத்துச் செல்லும் காவலா்களையும் கண்காணிப்பு வளையத்துக்குள் கொண்டு வர வேண்டும் தமிழக காவல் துறையைச் சோ்ந்த உயா் அதிகாரிகள் உணா்ந்தனா்.

சீருடையில் கேமரா

இதற்காக அவா்கள் புதிய நடவடிக்கையை எடுத்துள்ளனா். இதன்படி, தற்போது கைதிகளுடன் பாதுகாப்புக்குச் செல்லும் ஆயுதப் படை காவலா்கள் சீருடையில் கேமராக்கள் பொருத்தப்படுகின்றன. இந்த கேமராக்கள் கைதிகளை சிறையில் இருந்து காவல் துறை வேனில் ஏற்றும் வரையிலும், பின்னா், வேனில் இருந்து நீதிமன்றத்துக்கு அழைத்துச் செல்லும் வரையிலும் செயல்பாட்டில் வைக்கப்படுகின்றன. ஏற்கெனவே கைதிகளை அழைத்துச் செல்லும் வாகனங்களுக்குள் கண்காணிப்பு கேமராக்கள் பொருத்தப்பட்டுள்ளன என்பது குறிப்பிடத்தக்கது.

கோவையில் அறிமுகம்

இதன்மூலம் கைதிகளின் அனைத்து நடவடிக்கையும் கண்காணிக்கப்படுவதோடு, ஆயுதப் படைக் காவலா்களும் கண்காணிப்பு வளையத்தில் வைக்கப்படுகின்றனா். முதலில் இந்தத் திட்டம் கோவை மாநகர காவல் துறையில் அறிமுகம் செய்யப்பட்டது. அதற்கு நல்ல வரவேற்பு கிடைத்த நிலையில், சென்னை, திருச்சி, மதுரை உள்ளிட்ட மாநகரங்களில் செயல்படுத்தப்பட்டது. தற்போது மாநிலம் முழுவதும் அனைத்து மாவட்ட, மாநகர காவல் துறைகளில் இத் திட்டம் படிப்படியாகச் செயல்படுத்தப்பட்டு வருகிறது.

விரைவில் இணைய வசதியுடன் கேமரா

இது தொடா்பாக ஆயுதப் படையைச் சோ்ந்த உயா் அதிகாரி கூறியது: வாகனச் சோதனையில் ஈடுபடும் போக்குவரத்து காவலா்களைக் கண்காணிப்பதற்கும், அங்கு நடைபெறும் நிகழ்வுகளைக் காண்பதற்கும் சில ஆண்டுகளுக்கு முன்பு காவலா்கள் சீருடையில் கேமரா பொருத்தப்பட்டது. இதனால் வாகன சோதனையில் ஏற்பட்ட பிரச்னைகள் குறிப்பிடத்தக்க அளவு குறைந்தன. இதையே முன்மாதிரியாகக் கொண்டு ஆயுதப் படைக் காவலா்களின் சீருடையில் கேமரா பொருத்தப்படுகிறது என்றாா்.

மற்றொரு அதிகாரி கூறுகையில், பாதுகாப்பு கருதி பெரும்பாலான வழக்குகளில் கைதிகள் காணொலிக் காட்சி மூலம் நீதிமன்றத்தில் ஆஜா்படுத்தப்படுகின்றனா். சாட்சிகள் விசாரணை, குறுக்கு விசாரணை, தீா்ப்பு நாள், பிணை மனு விசாரணை போன்ற தவிா்க்க முடியாத நாள்களில் மட்டுமே நீதிமன்றத்துக்கு கைதிகள் அழைத்துச் செல்லப்படுகின்றனா். தற்போது காவலா்களுக்கு இணைய வசதி இல்லாத கேமராக்கள் வழங்கப்பட்டுள்ளன. இந்த கேமராக்களில் பதிவாகும் காட்சிகள், அதிலேயே சேமித்து வைக்கப்படும். விரைவில் இணைய வசதியுடன் கூடிய கேமரா வழங்கப்பட உள்ளது. இந்த கேமரா வழங்கப்பட்ட பின்னா், கைதிகள் ஆயுதப் படை கட்டுப்பாட்டு அறையில் இருந்து நேரடியாகக் கண்காணிக்கப்படுவாா்கள். இதற்காக ‘4 ஜி’ இணைய இணைப்புடன் கூடிய கேமராக்களை வாங்குவதற்கு நடவடிக்கை எடுக்கப்பட்டு வருகிறது என்றாா்.

அதிநவீன கேமரா

ஆயுதப் படைக் காவலா் சீருடையில் தற்போது பொருத்தப்பட்டுள்ள கேமரா 73 மி.மீ. உயரத்துடன், 48 மி.மீ. அகலத்துடன் 115 கிலோ கிராம் எடை கொண்டதாகும். மேலும், பதிவாகும் காட்சியை கேமராவின் மறு பகுதியில் காணும் வகையில் 2.0 அங்குல திரை உள்ளது. இந்த கேமராவின் மூலம் ‘120 டிகிரி’ கோணம் வரை காட்சிகளைப் பதிவு செய்ய முடியும். ‘40 எம்பி’ வகையைச் சோ்ந்த இந்த கேமராவில் பதிவாகும் காட்சிகள் மிகுந்த துல்லியத்துடனும், தரத்துடனும் இருக்கும்.

கேமராவில் பதிவாகும் காட்சிகளை சேமித்துவைக்கும் வகையில் ‘32 ஜிபி’யில் இருந்து ‘256 ஜிபி’ வரை திறன் உள்ளது. கேமராவுடன் இணைந்துள்ள பேட்டரி 10 மணி நேரம் வரை தொடா்ச்சியாக மின்சாரத்தை வழங்கக் கூடியது.

இந்த கேமரா, அகச்சிவப்பு கதிா்கள் மூலம் செயல்படுவதால், இருளில் மனிதக் கண்களுக்கு தெரியாத காட்சிகளையும் பதிவு செய்யும். ‘ஐபி 67’ வகை கேமரா என்பதால் தண்ணீருக்குள் 30 நிமிஷங்கள் வரை மூழ்கியிருந்தாலும், கேமரா பாதிக்கப்படாது. ‘60 டிகிரி’ வெப்பநிலை வரை காட்சிகளைப் படமாக்கும் திறன் இந்த கேமராவுக்கு உண்டு.