அரை நூற்றாண்டுக்குப் பின்னர் கால்பந்து உலகக் கோப்பையில் தேர்வான காங்கோ!

கால்பந்து உலகக் கோப்பை 2026க்கு காங்கோ அணி அரை நூற்றாண்டுக்குப் பின்னர் (52 ஆண்டுகள்) தகுதி பெற்று சாதனை படைத்துள்ளது.

ஜமைக்காவுக்கு எதிராக 120 நிமிஷங்கள் நடைபெற்ற இந்தப் போட்டியில் காங்கோ மக்களாட்சிக் குடியரசு அணி தகுதிச் சுற்றுப் போட்டியில் 1-0 என த்ரில் வெற்றி பெற்றது.

மெக்ஸிகோவில் ஸபோபன் திடலில் நடைபெற்ற இந்தப் போட்டியில் இரு அணிகளும் 90 நிமிஷங்கள் வரை ஒரு கோல் கூட அடிக்கவில்லை. பின்னர், ஆட்டம் கூடுதல் நேரத்துக்குச் சென்றது.

சரியாக 100ஆவது நிமிஷத்தில் காங்கோ அணியின் சிபெங்காவின் கார்னர் கிக்கில், அதே நாட்டின் டிஃபெண்டர் ஆக்செல் டுவான்செபே கோல் அடித்து அசத்தினார்.

இந்த கோல் சரியானதுதானா, கைகளில் பட்டதா என விஏஆர் சோதனைக்குப் பிறகு உறுதிசெய்யப்பட்டது. 1974ஆம் ஆண்டுக்குப் பிறகு காங்கோவின் கனவு நனவாகியுள்ளது. 120 நிமிஷத்தின் கடின உழைப்பு இந்தப் பெருமையைப் பெற்றுத் தந்துள்ளது.