விநாயகர் சதுர்த்தி: தோவாளை சந்தையில் அருகம்புல் விலை 3 மடங்கு உயர்வு

விநாயகர் சதுர்த்தி விழாவையொட்டி, கன்னியாகுமரி மாவட்டம், தோவாளை சந்தையில் பூக்கள் விற்பனை அதிகரித்திருந்தது. அருகம்புல் விலை 3 மடங்கு உயர்ந்திருந்தது. 
தென் மாவட்டங்களில் பிரசித்திபெற்ற தோவாளை பூச்சந்தையில் ஓணம், கிறிஸ்துமஸ், தீபாவளி , பொங்கல் உள்ளிட்ட பல்வேறு பண்டிகைக் காலங்களில் தமிழகத்தின் பல்வேறு பகுதிகளிலிருந்து மட்டுமன்றி, பெங்களூரு, மைசூரு போன்ற வெளி மாநிலப் பகுதிகளிலிருந்தும் ஏராளமான பூக்கள் விற்பனைக்கு வரும்.
விநாயகர் சதுர்த்தி விழாவையொட்டி, வியாழக்கிழமை தோவாளை பூச்சந்தைக்கு பெங்களூரு, ஓசூர், மதுரை உள்ளிட்ட பல்வேறு பகுதிகளிலிருந்து வழக்கத்தை விட அதிக பூக்கள் விற்பனைக்கு வந்தன. 
மல்லிகை கிலோ ரூ. 600-க்கும் , பிச்சிப்பூ ரூ. 500-க்கும், முல்லை ரூ. 400-க்கும் விற்பனையாகின.
விநாயகருக்கு உகந்த அருகம்புல் ஒரு கட்டு வழக்கமாக ரூ. 10-க்கு விற்பனையாகும். ஆனால், வியாழக்கிழமை அருகம்புல் ஒரு கட்டு ரூ. 30-க்கு விற்பனையானது. விநாயகர் சிலைக்கு மாலையாகப் போடப் பயன்படுத்தப்படும் எருக்கம்பூ கிலோ ரூ. 100-க்கு விற்பனையானது. தெத்திப்பூ ரூ. 200ஆக இருந்தது.