பேரறிவாளன் உள்ளிட்ட 7 போ் விடுதலையில், ஆளுநரின் நடவடிக்கை அதிர்ச்சியளிக்கிறது: திருமாவளவன்

சென்னை: பேரறிவாளன் உள்ளிட்ட 7 போ் விடுதலை தொடர்பாக மத்திய உள்துறை அமைச்சகத்தின் கருத்தை தமிழக ஆளுநா் கேட்டிருப்பதாக வெளியாகியுள்ள செய்தி அதிர்ச்சியளிப்பதாக விடுதலைச் சிறுத்தைகள் கட்சித் தலைவர் திருமாவளவன் தெரிவித்துள்ளார்.

இதுதொடர்பாக அவர் வியாழக்கிழமை வெளியிட்ட அறிக்கை:

"பேரறிவாளன் உள்ளிட்ட ஏழு பேரையும் விடுதலை செய்ய வேண்டுமென தமிழக அமைச்சரவை பரிந்துரை செய்துள்ள நிலையில், அது குறித்து மத்திய உள்துறை அமைச்சகத்தின் கருத்தை ஆளுநா் கேட்டிருப்பதாக வெளியாகியுள்ள செய்தி அதிர்ச்சியளிக்கிறது. 

இது காலம் தாழ்த்தும் நடவடிக்கை மட்டுமல்ல, மாநில உரிமைகளுக்கு முரணானது ஆகும். 

அரசியலமைப்புச் சட்டப் பிரிவு 161 இன் கீழ் ஆளுநர் முடிவெடுக்கும் போது உள்துறை அமைச்சகத்தையோ, மத்திய அரசையோ கலந்தாலோசிக்குமாறு அந்த சட்டத்திலோ அல்லது நீதிமன்ற தீர்ப்புகளிலோ குறிப்பிடப்படவில்லை. 

எனவே, ஆளுநர் தனது முடிவை மறுபரிசீலனை செய்து ஏழு பேரின் விடுதலைக்கு உடனடியாக நடவடிக்கை எடுக்க வேண்டும்" எனத் தெரிவித்துள்ளார்.