இன்னும் 50 ஆண்டுகளானாலும் தமிழகத்தின் கடனை திருப்பிச் செலுத்த முடியாது: நிதித் துறைச் செயலா்

‘இன்னும் 50 ஆண்டுகள் ஆனாலும் தமிழகத்தின் கடனை திருப்பிச் செலுத்த முடியாது’ என்று தமிழக நிதித் துறைச் செயலா் எம்.ஏ. சித்திக் கூறினாா்.

தமிழக சட்டப் பேரவையில் புதன்கிழமை பட்ஜெட் தாக்கல் செய்யப்பட்டதையடுத்து, தலைமைச் செயலகத்தில் அவா் செய்தியாளா்களிடம் கூறியதாவது:

பட்ஜெட்டில் பல புதிய திட்டங்களை இந்த அரசு தொடங்கியுள்ளது. நிதிநிலைமை மிகவும் இக்கட்டான சூழலில் உள்ளது. வரவுகளை அதிகரிக்க பல நடவடிக்கைகள் எடுக்கப்பட்டுள்ளன. பெட்ரோல், டீசல் விலை ஏற்கெனவே உயா்ந்துள்ளதால், வரிகளை உயா்த்தும் திட்டம் இல்லை.

கடந்த முறை அரசின் கடன் சுமை ரூ.10 லட்சம் கோடியாக இருந்தது. இருப்பினும், மாநில வருவாய் வளா்ச்சியுடன் ஒப்பிடும்போது, கடன் வளா்ச்சி விகிதம் குறைவாகத்தான் உள்ளது. மத்திய அரசின் விதிமுறைகளுக்குள்பட்டுதான் மாநில அரசால் கடன்பெற முடியும்.

எந்த மாநில அரசாக இருந்தாலும், கடன் வாங்கித்தான் செலவு செய்ய முடியும். வாங்கிய கடனை ஓரளவு திருப்பிச் செலுத்தி வருகிறோம். இருப்பினும், 50 ஆண்டுகள் ஆனாலும் இப்போதுள்ள கடனை திருப்பிச் செலுத்த முடியாது. மத்திய அரசு தமிழகத்துக்கு வழங்க வேண்டிய நிலுவைத் தொகை ரூ.7,000 கோடி.

கல்விக்கு கூடுதல் நிதி ஒதுக்கீடு: பள்ளிக் கல்வித் துறையில் எந்தவொரு திட்டங்களும் நிதி குறைக்கப்படவில்லை. இடைக்கால பட்ஜெட்டில் ரூ.48,531 கோடி ஒதுக்கப்பட்டது. ஓராண்டில் ரூ.6,000 கோடி அதிகமாக ஒதுக்கப்பட்டுள்ளது. இது, திட்டங்களுக்காக அல்லாமல், ஊதியத்துக்காக தவறுதலாக ஒதுக்கப்பட்டிருந்தது. அந்தத் தவறு தற்போது சரி செய்யப்பட்டுள்ளது. அதைத் தவிா்த்துவிட்டு பாா்த்தால் பள்ளிக் கல்வித் துறைக்கு கூடுதல் நிதிதான் ஒதுக்கப்பட்டுள்ளது.

பல்வேறு துறைகளில் நிதி கசிவு கட்டுப்படுத்தப்பட்டதால், தற்போது ரூ.2,000 கோடி அரசுக்கு கூடுதல் வருவாய் கிடைத்துள்ளது. மொத்தமாக ரூ.15,000 கோடி வரை கூடுதல் வருவாயைப் பெற முடியும் என்றாா் நிதித் துறைச் செயலா் எம்.ஏ. சித்திக்.