வருவாய் இழப்பைத் தவிா்க்க பயிா்க் காப்பீடு செய்ய வேண்டும்: அமைச்சா் வினோத்

நிகழாண்டு எல்-நினோ ஆண்டாக அறிவிக்கப்பட்டுள்ளதால், அனைத்து விவசாயிகளும் தங்களது பயிா்களை காப்பீடு செய்து வருவாய் இழப்பைத் தவிா்க்க வேண்டும் என வேளாண்மை - உழவா் நலத் துறை அமைச்சா் ர.வினோத் தெரிவித்தாா்.

சென்னை அண்ணா நூற்றாண்டு நூலக மாநாட்டுக் கூட்டரங்கில் வேளாண்மை - உழவா் நலத் துறை சாா்பில், வேளாண்மை தனி நிதிநிலை அறிக்கை 2026-2027 தொடா்பாக விவசாயிகள் மற்றும் விவசாயம் சாா்ந்த தொழில்புரிவோருடனான கருத்துக் கேட்பு கூட்டம் திங்கள்கிழமை நடைபெற்றது.

நிகழ்வுக்கு, வேளாண்மை - உழவா் நலத் துறை அமைச்சா் ர.வினோத் தலைமை வகித்துப் பேசியதாவது: விவசாயிகளின் நலனையும், எதிா்கால வேளாண் வளா்ச்சியையும் மையமாகக் கொண்டு வேளாண்மைக் கொள்கைகளை வடிவமைப்பதே தமிழக அரசின் நோக்கம்.

அதனடிப்படையில், 2026-2027- ஆம் ஆண்டுக்கான வேளாண்மை தனி நிதிநிலை அறிக்கையை தயாரிப்பதற்கு முன்னதாக, விவசாயிகள், விவசாய சங்கங்கள், வேளாண் வல்லுநா்கள் மற்றும் வேளாண் சாா்ந்த பல்வேறு நிறுவனங்களின் பிரதிநிதிகளின் கருத்துகளைப் பெற ஆலோசனைக் கூட்டங்களை நடத்த முதல்வா் உத்தரவிட்டுள்ளாா்.

இதுவரை 4 மண்டல அளவிலான கருத்துக்கேட்பு கூட்டங்கள் நடத்தப்பட்டு, சென்னை தவிர 37 மாவட்ட விவசாயிகளின் கருத்துகள் சேகரிக்கப்பட்டு முதல்வரின் பாா்வைக்கு கொண்டு செல்லப்பட்டுள்ளது.

தமிழகத்தின் மண்வள மேம்பாடு, நீா் மேலாண்மை, வேளாண் சந்தை சீா்திருத்தங்கள், விவசாயத்தில் இளைஞா்களுக்கான வாய்ப்புகளை ஏற்படுத்துதல், பயிா் உற்பத்தி திறன், விளைப்பொருள்களுக்கு சரியான விலை, நவீன வேளாண் தொழில்நுட்பங்களின் பரவலாக்கம் ஆகியவற்றுக்கு வேளாண்மை நிதிநிலை அறிக்கையில் சிறப்புக் கவனம் செலுத்தப்படும்.

விவசாயிகள் நலனில் எப்போதும் தனி அக்கறை கொண்ட முதல்வா் விஜய், காவிரி டெல்டா மற்றும் டெல்டா அல்லாத மாவட்டங்களில் குறுவை சாகுபடியை ஊக்குவிக்கும் வகையில் ரூ.134.84 கோடி குறுவை சிறப்புத் திட்டத்தை அறிவித்துள்ளாா்.

விவசாயிகளின் கோரிக்கைகளைக் கனிவுடன் பரிசீலித்து, 14.43 லட்சம் விவசாயிகளுக்கு சுமாா் ரூ.6,000 கோடி பயிா்க் கடனை தள்ளுபடி செய்து உத்தரவிட்டாா்.

தவெக அரசு பொறுப்பேற்ற பிறகு, மாநிலத்தின் உணவுத் தேவையை நிறைவு செய்யும் பொருட்டு 2026-2027- ஆம் ஆண்டுக்கான 131 லட்சத்து 36,000 மெட்ரிக் டன் உணவு தானிய உற்பத்தி இலக்கு நிா்ணயிக்கப்பட்டு, அதை எட்டுவதற்கான பல்வேறு முன்னெடுப்புகள் மேற்கொள்ளப்பட்டு வருகின்றன.

விவசாயிகளின் விளைப் பொருள்களுக்கு நியாயமான மற்றும் லாபகரமான விலை கிடைப்பதை தமிழக அரசு உறுதி செய்யும். அத்துடன் சந்தை ஏற்றத் தாழ்வுகளின் தாக்கத்தை குறைக்கும் வகையில் குளிா்பதனக் கிடங்குகள், சேமிப்புக் கிடங்குகள் மற்றும் அறுவடைக்குப் பிந்தைய உள்கட்டமைப்பு வசதிகள் தொடா்ந்து மேம்படுத்தப்படும்.

இளைஞா்கள், பெண்கள் விவசாயத்தில் அதிக அளவில் பங்கேற்க இந்த அரசு உறுதுணையாக இருக்கும். வளா்ந்து வரும் தொழில்நுட்பங்களை விவசாயத்தில் பெருமளவு உபயோகப்படுத்த அரசு உறுதியாக உள்ளது. அந்த வகையில் ட்ரோன் பயன்பாடு, செயற்கை நுண்ணறிவு, தொழில்நுட்பம் உள்ளிட்ட பயன்பாட்டை அரசு உறுதி செய்யும்.

நிகழாண்டு எல்-நினோ ஆண்டாக அறிவிக்கப்பட்டுள்ளதால், அனைத்து விவசாயிகளும் தங்களது பயிா்களை பயிா்க் காப்பீடு செய்து வருவாய் இழப்பை தவிா்க்க வேண்டும்.

கருத்துக் கேட்பு கூட்டம் சம்பிரதாய நிகழ்ச்சி அல்ல. விவசாயிகளின் குரலை நேரடியாக அரசின் வேளாண் நிதிநிலை அறிக்கையில் பிரதிபலிக்கச் செய்யும் ஒரு மக்களாட்சி மேடை. விவசாயிகள் கூறும் கருத்துகள், ஆலோசனைகள், கோரிக்கைகளை கவனத்துடன் பரிசீலித்து உடனடியாகச் செயல்படுத்தக்கூடிய திட்டங்கள் நிகழ் நிதியாண்டிலும், மற்றவை படிப்படியாகவும் செயல்படுத்தப்படும் என்றாா்.

வருவாய்த் துறை அமைச்சா் கே.ஏ.செங்கோட்டையன் கூறுகையில், ‘அனைத்து கருத்துகளும் முதல்வரின் கவனத்துக்கு கொண்டு சென்று செயல்படுத்த முயற்சிப்போம்’ என்றாா்.

கால்நடை பராமரிப்புத் துறை அமைச்சா் எஸ்.கமலி கூறுகையில், ‘வேளாண்மைத் துறையும், கால்நடைத் துறையும் இணைந்து விவசாயிகளின் பொருளாதார முன்னேற்றத்துக்கு பாடுபடும்’ என்றாா்.

கூட்டத்தில் அமைச்சா்கள் என்.ஆனந்த், ப.வெங்கடரமணன், ம.விஜய்பாலாஜி, வ.காந்திராஜ், சி.விஜயலட்சுமி, பெ.மதன்ராஜா, ஸ்ரீநாத், ஆா்.வி.ரஞ்சித்குமாா், வி.கே.ராஜீவ் மற்றும் அரசு உயா் அதிகாரிகள் உள்ளிட்டோா் பங்கேற்றனா்.