வாரத்தின் முதல் நாளான இன்று(ஏப்ரல் 7) பங்குச்சந்தைகள் வரலாறு காணாத கடும் சரிவைச் சந்தித்து வருகின்றன.

கடந்த வார இறுதியில் சரிவுடன் முடிந்த பங்குச்சந்தை இன்று கடும் சரிவைச் சந்தித்து வருகிறது.

மும்பை பங்குச் சந்தை குறியீட்டு எண் சென்செக்ஸ் இன்று காலை 71,449.94 என்ற புள்ளிகளில் தொடங்கிய நிலையில் காலையில் சுமார் 4,000 புள்ளிகள் சரிந்தது.

நண்பகல் 12.10 மணி நிலவரப்படி, சென்செக்ஸ் 3,014.98 புள்ளிகள் சரிந்து 72,349.70 புள்ளிகளில் வர்த்தகமாகி வருகிறது.

தேசிய பங்குச்சந்தை குறியீட்டு எண் நிஃப்டி 971.60 புள்ளிகள் குறைந்து 21,932.85 என்ற புள்ளிகளில் வர்த்தகமாகி வருகிறது.

சென்செக்ஸ் இதுவரை இல்லாத அளவுக்கு 5% வரை குறைந்துள்ளது.

அனைத்துப் பங்குகளும் இன்று வரலாறு காணாத கடும் சரிவைச் சந்தித்து வருகின்றன. டாடா மோட்டார்ஸ் மற்றும் டாடா ஸ்டீல் நிறுவனங்களின் பங்குகள் அதிகபட்சமாக 10% வரை குறைந்துள்ளன.

எல் & டி, ஹெச்சிஎல் டெக்னாலஜிஸ், அதானி போர்ட்ஸ், டெக் மஹிந்திரா, இன்ஃபோசிஸ், டாடா கன்சல்டன்சி சர்வீசஸ், ரிலையன்ஸ் இண்டஸ்ட்ரீஸ், மஹிந்திரா & மஹிந்திரா ஆகிய நிறுவனங்களின் பங்குகள் விலை கடும் சரிவைச் சந்தித்துள்ளன.

தற்போதைய நிலவரப்படி 20.16 லட்சம் கோடி ரூபாய் இழப்பு ஏற்பட்டுள்ளது. இதனால் முதலீட்டாளர்கள் கடும் அதிர்ச்சியில் உறைந்துள்ளனர்.

காரணங்கள் என்ன?

இந்தியா உள்பட பல்வேறு நாடுகளின் மீது அமெரிக்க அதிபர் டொனால்ட் டிரம்ப் 10 முதல் 50% வரை வரிவிதிப்பு செய்தது, உலக அளவில் வர்த்தகப் போர் ஏற்படும் அச்சத்தை உருவாக்கியுள்ளது. மேலும், பொருளாதார மந்தநிலை ஏற்படும் பதற்றமும் உள்ளது.

இதன் காரணமாக இந்திய பங்குச்சந்தை மட்டுமின்றி உலக அளவில் பல நாடுகளின் பங்குச்சந்தைகள் கடும் சரிவைச் சந்தித்து வருகின்றன.

அதிகபட்சமாக சீனாவின் ஹாங்காங் பங்குச்சந்தை 11% சரிவைச் சந்தித்துள்ளது. ஜப்பான் டோக்கியோ (7%), சீனாவின் ஷாங்காய் (7%), தென் கொரியா(5%) சரிந்துள்ளன.

அமெரிக்க பங்குச்சந்தைகளும் கடந்த வெள்ளிக்கிழமை சரிவுடன்தான் முடிந்துள்ளன.

அமெரிக்க வரிவிதிப்பால் பங்குச்சந்தையின் இன்றைய வீழ்ச்சி தொடக்கம்தான் என்றும் இது எப்படி மாறும் எனத் தெரியவில்லை என்றும் பங்குச்சந்தை நிபுணர்கள் கூறுகின்றனர். இதனால் அமெரிக்க கருவூலம் போன்ற பாதுகாப்பான வர்த்தகத்தில் முதலீட்டாளர்கள் இறங்கியுள்ளனர்.

உலக அளவில் பொருள்களின் விலை குறைந்துள்ளது, கச்சா எண்ணெய் விலை(2.76%), தங்கம் மற்றும் வெள்ளி விலை குறைந்துள்ளதால் பொருளாதார மந்த நிலை ஏற்படும் சூழல் ஏற்பட்டுள்ளது.

இவற்றின் காரணமாக பங்குச்சந்தைகள் கடும் சரிவைச் சந்தித்து வருகின்றன.

இதையும் படிக்க | அதிகரித்து வரும் பெருங்குடல் புற்றுநோய்! மருத்துவர்கள் எச்சரிக்கை!!