பொய் வழக்கு: விசாரணை அலுவலா் மீது நடவடிக்கை எடுக்க உத்தரவு

இளைஞா் மீது பொய் வழக்குப் பதிவு செய்த விவகாரத்தில், விசாரணை அலுவலா் மீது மதுரை மாநகா் காவல் ஆணையா் மூன்று மாதங்களுக்குள் உரிய நடவடிக்கை எடுக்க சென்னை உயா்நீதிமன்ற மதுரை அமா்வு புதன்கிழமை உத்தரவிட்டது.

மதுரையைச் சோ்ந்த சிவகணேஷ் சென்னை உயா்நீதிமன்ற மதுரை அமா்வில் தாக்கல் செய்த மனு:

மதுரை எஸ்.எஸ்.காலனி காவல் நிலைய போலீஸாா் கடந்த 2020-ஆம் ஆண்டு என் மீது பொய்யாகப் பதிவு செய்த கஞ்சா வழக்கை ரத்து செய்ய வேண்டும் என அவா் கோரினாா்.

இந்த மனுவை ஏற்கெனவே விசாரித்த உயா்நீதிமன்றம், மதுரை மாவட்ட ஐந்தாவது குற்றவியல் நீதித் துறை நடுவா் அறிக்கை தாக்கல் செய்யவும், விசாரணை அலுவலா் நேரில் முன்னிலையாகி விளக்கமளிக்கவும் உத்தரவிட்டது.

இந்த நிலையில், இந்த மனு உயா்நீதிமன்ற நீதிபதி பி. முருகன் முன் புதன்கிழமை மீண்டும் விசாரணைக்கு வந்தது.

அப்போது, விசாரணை அலுவலா் நேரில் முன்னிலையாகி, இந்த விவகாரத்தில் குற்றப் பத்திரிகை அனுப்புவதில் தாமதம் ஏற்பட்டதற்கு வருத்தம் தெரிவித்தாா்.

மேலும், நீதித் துறை நடுவா் தாக்கல் செய்த அறிக்கையில், குற்றப் பத்திரிகை, முதல் தகவல் அறிக்கை கடந்த 2025-ஆம் ஆண்டு தாக்கல் செய்யப்பட்டது. பின்னா், 2026-இல் விசாரணைக்கு எடுக்கப்பட்டது எனத் தெரிவிக்கப்பட்டது.

இதையடுத்து, நீதிபதி பிறப்பித்த உத்தரவு:

இந்த விவகாரத்தில் குற்றப் பத்திரிகை கடந்த ஆண்டு அக்டோபரில் தாக்கல் செய்யப்பட்டது. ஆனால், 2026-ஆம் ஆண்டில் வழக்கு விசாரணைக்கு எடுத்துக் கொள்ளப்பட்டது. இதுதொடா்பாக காவல் துறை கால நீட்டிப்புக் கோரி மனு தாக்கல் செய்யவில்லை. தாமதத்தை மன்னித்து, நீதித் துறை நடுவரும் எந்த உத்தரவும் பிறப்பிக்கவும் இல்லை.

காலவரம்பு முடிந்துகூட நீதிமன்றம் வழக்கை விசாரணைக்கு எடுக்கலாம். ஆனால், கால தாமதத்துக்கான காரணத்தை முறையாக விளக்க வேண்டும். காவல் துறை அறிக்கை தாக்கல் செய்வதற்கான தாமதத்துக்கு விசாரணை அலுவலா் தகுந்த காரணத்தைத் தெரிவிக்க வேண்டும். இது தொடா்பாக நீதித் துறை நடுவா் எழுத்துப்பூா்வ உத்தரவு பிறப்பிக்க வேண்டும். இந்த வழக்கில் இந்த நடைமுறை பின்பற்றப்படவில்லை.

மேலும், விசாரணை அலுவலரின் கூற்று நம்பும்படியாக இல்லை. வழக்குப் பதிவு செய்த நாளில் விசாரணை நடத்தப்பட்டு குற்றப் பத்திரிகை தயாரித்ததாக அவா் கூறியுள்ளாா். ஆனால், குற்றப் பத்திரிகையில் ‘பிஎன்எஸ்எஸ்’ சட்டப் பிரிவு சோ்க்கப்பட்டுள்ளது. கடந்த 2020-ஆம் ஆண்டு குற்றப் பத்திரிகை தாக்கல் செய்திருந்தால் 2024-இல் அமலுக்கு வந்த ‘பிஎன்எஸ்எஸ்’ சட்டப்பிரிவை அதில் குறிப்பிட்டது எப்படி?. இதிலிருந்து மனுதாரா் மீது பொய் வழக்குப் பதிவு செய்திருப்பது உறுதியாகிறது.

எனவே, இந்த வழக்கில் விசாரணை அலுவலா் மீது 3 மாதங்களில் மதுரை மாநகா் காவல் ஆணையா் உரிய நடவடிக்கை எடுக்க வேண்டும். இந்த வழக்கில் ‘பிஎன்எஸ்எஸ்’ பிரிவு சோ்க்கப்பட்டிருப்பதை முறையாகக் கவனிக்காமல் நீதித் துறை நடுவா் வழக்கை விசாரணைக்கு எடுத்துள்ளாா். இதை ஏற்க முடியாது. நீதித் துறை நடுவா்கள் வெறும் முத்திரை பதிப்பது அல்லது குறிப்பு எழுதுவது மூலம் வழக்கை விசாரணைக்கு எடுக்கக் கூடாது. வழக்கின் மீது சட்டரீதியான தங்களின் சிந்தனையை செலுத்த வேண்டும். எனவே, மனுதாரா் மீதான வழக்கு ரத்து செய்யப்படுகிறது என்றாா் நீதிபதி.