கடைமடை பாசன வாய்க்காலை தூர்வார வலியுறுத்தல்

கடைமடை பகுதி பாசன வாய்க்கால்களை முழுமையாக தூர்வார வேண்டும் என விவசாயிகள் குறைதீர் கூட்டத்தில் விவசாயிகள் வலியுறுத்தினர். 
தரங்கம்பாடி வட்டாட்சியர் அலுவலகத்தில், புதன்கிழமை வட்டாட்சியர் சுந்தரம் தலைமையில் தரங்கம்பாடி தாலுக்காவுக்கு உள்பட்ட பொறையாறு, திருக்கடையூர், ஆக்கூர், செம்பனார்கோவில், திருவிளையாட்டம், சங்கரன்பந்தல் கிடங்கல் பகுதிக்கான விவசாயிகள் குறைதீர்க் கூட்டம் நடைபெற்றது. 
கூட்டத்தில், நாகை வடக்கு மாவட்ட பாஜக பொதுச் செயலர் அமிர்த. விஜயகுமார் அளித்த கோரிக்கை மனு விவரம்: கீழ்மாத்தூர் மஞ்சளாறு தடுப்பணையிலிருந்து பிரியும் ராஜேந்திரன் வாய்க்கால், வெட்டி வாய்க்கால், சீதைசிந்தாமணி வாய்க்கால், கோணிக்கரை வாய்க்கால் மற்றும் அன்னப்பன்பேட்டை வாய்க்கால் பல ஆண்டுகளாக தூர்வாராமல் இருந்து வந்த நிலையில், நிகழாண்டு தூர்வாரப்பட்டது. இப்பணி முழுமையாகததால் தண்ணீர் வராமல் சம்பா விவசாய பணி செய்ய முடியாமல் விவசாயிகள் பாதிக்கப்பட்டுள்ளனர். இங்கு சுமார் 5 ஆயிரம் ஏக்கருக்கு மேற்பட்ட விவசாய நிலங்கள் உள்ளன. எனவே, சம்பா பணியை தொடர வாய்க்கால்களை முழுமையாக தூர்வாரி தண்ணீர் விட வேண்டும். மேலும், கீழ்மாத்தூர் தடுப்பணையிலிருந்து பிரியும் அனைத்து வாய்க்கால்களில் கட்டப்பட்டு வரும் மதகுகளை விரைவில் கட்டி முடிக்க வேண்டும் என அதில் குறிப்பிடப்பட்டுள்ளது. கூட்டத்தில், காழிப்பநல்லூர் விவசாய சங்கத் தலைவர் அருள்தாஸ் பேசியது: இப்பகுதியில் விவசாயத்துக்கு மும்முனை மின்சாரம் வழங்க வேண்டும், தூர்வாராமல் உள்ள ஓடை வாய்க்காலை தூர்வாரி தண்ணீர் விடவேண்டும் என்றார்.