புதுக்கோட்டையில் கைம்பெண்களுக்கு இலவச தையல் இயந்திரங்கள் வழங்கல்

புதுக்கோட்டை திலகவதியாா் திருவருள் ஆதீனம் சாா்பில் டாக்டா் முத்துலட்சுமி ரெட்டி அம்மையாரின் 141-ஆவது பிறந்த நாளையொட்டி, கைம்பெண்களுக்கு இலவச தையல் இயந்திரங்கள் வழங்கும் நிகழ்ச்சி சனிக்கிழமை நடைபெற்றது.

நிகழ்ச்சிக்கு, ஆதீனகா்த்தா் தயானந்த சந்திரசேகர சுவாமிகள் தலைமை வகித்தாா். புதுக்கோட்டைத் தமிழ்ச் சங்கத் தலைவா் கவிஞா் தங்கம்மூா்த்தி, சா்வஜித் அறக்கட்டளையின் தலைவா் டாக்டா் எஸ். ராம்தாஸ் ஆகியோா் கலந்து கொண்டு கைம்பெண்களுக்கு தையல் இயந்திரங்களை வழங்கிப் பேசினா்.

மாணவிகள் சோபனா, அபிஜா ஆகியோா் முத்துலட்சுமி அம்மையாா் குறித்துப் பேசினா். நிகழ்ச்சியில், தொல்லியல் துறை ஓய்வுபெற்ற உதவி இயக்குநா் ஜெ. ராஜாமுகமது, திருக்கு பேரவைச் செயலா் ராமுக்கண்ணு, வாசகா் பேரவைச் செயலா் சா. விஸ்வநாதன், விவசாயிகள் சங்க மாநிலப் பொதுச் செயலா் கோ.ச. தனபதி, தமிழ்ப் பேராசிரியா் சி. சேதுராமன் உள்ளிட்டோா் பங்கேற்றனா்.

முன்னதாக ஆா்எம்வீ. கதிரேசன் வரவேற்றாா். நிறைவாக, ந. புண்ணியமூா்த்தி நன்றி கூறினாா்.