ரேஷன் அட்டைதாரர்களுக்கு ரூ. 700 தீபாவளி மளிகை தொகுப்பு! புதுவை அரசு

புதுவையில் உள்ள ரேஷன் அட்டைதாரர்களுக்கு தீபாவளியை முன்னிட்டு ரூ. 700 மதிப்புள்ள மளிகை பொருள்கள் தொகுப்பு வழங்கப்படும் என்று அறிவிக்கப்பட்டுள்ளது.

நாடு முழுவதும் வருகின்ற நவம்பர் 8 ஆம் தேதி தீபாவளி பண்டிகை கோலாகலமாக கொண்டாடப்படவுள்ளது.

இந்த நிலையில், புதுவையில் உள்ள 3 லட்சம் ரேஷன் அட்டைதாரர்களுக்கு நியாய விலைக் கடைகள் மூலம் ரூ. 700 மதிப்புள்ள மளிகை பொருள்கள் தொகுப்பு வழங்கப்படவுள்ளதாக அமைச்சர் சிவக்கொழுந்து அறிவித்துள்ளார்.

அந்த தீபாவளி மளிகை தொகுப்பில், சமையல் எண்ணெய் 2 லிட்டர், சர்க்கரை 2 கிலோ, கடலைப் பருப்பு ஒரு கிலோ, ரவை அரை கிலோ, மைதா அரை கிலோ இடம்பெறும் என்று தெரிவிக்கப்பட்டுள்ளது.

கடந்தாண்டும் தீபாவளி பண்டிகையை முன்னிட்டு, புதுவை அரசு சார்பில் மளிகை பொருள்கள் தொகுப்பு வழங்கப்பட்டது குறிப்பிடத்தக்கது.